Тошкент, Ўзбекистон (UzDaily.uz) — 2025 йил 12 июнь куни Ижтимоий ҳимоя миллий агентлигида Полша Таълим вазири Б. Новатская бошчилигидаги делегация билан учрашув бўлиб ўтди.
Учрашувда томонлар инклюзив таълим, ногиронлиги бўлган болалар учун шарт-шароитлар яратиш, педагог ва ассистентларни тайёрлаш, ота-оналарни қўллаб-қувватлаш масалаларини муҳокама қилди.
Полша вакиллари мамлакатларимиз ўртасида умумий вазифалар борлигини таъкидлади ва ўз тажрибалари – индивидуал ёндашув, рақамли ечимлар, УНИСEФ билан ҳамкорлик каби йўналишлар бўйича маълумотлар берди.
Учрашув якунида қуйидаги йўналишларда ҳамкорлик қилишга келишиб олинди:
Ўзбекистон мутахассисларининг Полшага ўқув ташрифларини ташкил этиш;
Педагог ва ассистентларни тайёрлаш бўйича тажриба алмашиш;
Инклюзив таълим ва касбга йўналтириш бўйича илғор ечимларни ўрганиш.
Томонлар мулоқотни давом эттириш ва ҳамкорликни чуқурлаштиришга келишиб олдилар.
