Ўзбекистон ва Leapmotor электромобиллар ишлаб чиқаришни муҳокама қилишди

Тошкент, Ўзбекистон (UzDaily.uz) — Ўзбекистон инвестициялар, саноат ва савдо вазири ўринбосари Илзат Касимов ҳамда Хитойнинг «Leapmotor» компанияси вице-президенти Лей Мин ўртасида бўлиб ўтган учрашувда электромобиллар ишлаб чиқаришни биргаликда йўлга қўйиш масаласи муҳокама қилинди.

Мулоқот чоғида асосий эътибор маҳаллийлаштириш даражасини юксалтириш ҳамда тайёр маҳсулот таркибидаги маҳаллий бутловчи қисмлар улушини босқичма-босқич ошириш истиқболларига қаратилди.

Ривожланиш стратегияси нафақат ички бозорни тўлдиришни, балки халқаро бозорларга чиқиш учун экспорт салоҳиятидан самарали фойдаланишни ҳам кўзда тутади.

Музокаралар якунида томонлар мулоқотни янада кенгайтириш ва мазкур лойиҳани ҳаётга татбиқ этиш мақсадида амалий ҳамкорлик босқичларига ўтишга келишиб олдилар.