Ўзбекистон Бош вазири Қирғизистонга амалий ташриф билан келди

Тошкент, Ўзбекистон (UzDaily.uz) — Ўзбекистон Республикаси Бош вазири Абдулла Арипов 2026 йил 22 июнь куни амалий ташриф билан Қирғиз Республикасига келди.

«Иссиқкўл» халқаро аэропортида Ўзбекистон ҳукумати раҳбарини Қирғиз Республикаси Президенти Администрацияси раҳбари ҳамда Вазирлар Маҳкамаси раиси Адилбек Қасималиев кутиб олди.

Ташрифнинг асосий дастури 23 июнь кунига режалаштирилган. Абдулла Арипов ва Адилбек Қасималиев ҳамраислигида Икки томонлама ҳамкорлик бўйича Қўшма ҳукуматлараро комиссиянинг 12-йиғилиши бўлиб ўтади.

Музокаралар тор ва кенгайтирилган таркибларда ўтказилади. Учрашувлар давомида томонлар давлатлараро ҳамкорликнинг асосий йўналишларини батафсил кўриб чиқадилар.

Комиссия иши якунлари бўйича икки томонлама ҳужжатлар тўпламини имзолаш режалаштирилган.