Тошкент, Ўзбекистон (UzDaily.uz) — Колумбия миллий терма жамоаси футбол бўйича жаҳон чемпионати 1/16 финалида Гана устидан 1:0 ҳисобида минимал ғалабага эришиб, мусобақанинг кейинги босқичига йўл олди. Канзас-Сити шаҳрида бўлиб ўтган учрашувда ягона гол муаллифи Жон Ариас бўлди.
У 14-дақиқада рақиб дарвозасини ишғол этиб, жамоасига ғалаба келтирган ҳал қилувчи голни урди.
Колумбия терма жамоасининг асосий таркибида Россиянинг FC Krasnodar клуби ҳужумчиси Жон Кордоба майдонга тушди. Бироқ у учрашувнинг дастлабки дақиқаларида жароҳат олди ва алмаштирилди. Унинг ўрнига 8-дақиқада Луис Суарес майдонга кирди.
Колумбия жаҳон чемпионатининг 1/8 финали йўлланмасини қўлга киритган сўнгги жамоага айланди. Мусобақанинг кейинги босқичида жанубий америкаликлар Швейцария терма жамоасига қарши баҳс олиб боради. Швейцария аввалроқ Жазоирни 2:0 ҳисобида мағлуб этган эди. Учрашув 7 июль куни Ванкувер шаҳрида бўлиб ўтади.
Футбол бўйича жаҳон чемпионати АҚШ, Канада ва Мексикада ташкил этилмоқда ва 19 июль куни якунланади. Турнирнинг амалдаги ғолиби Аргентина терма жамоаси ҳисобланади.
