Тошкент, Ўзбекистон (UzDaily.uz) — Фарғона вилоятида Хитойнинг Jinan Fengmian Machinery Equipment Co., Ltd. компанияси томонидан таклиф этилган инвестиция лойиҳаси кўриб чиқилди. Компания хом пахтани қайта ишлаш ва пахта ёғи ишлаб чиқаришга ихтисослашган саноат мажмуасини қуришни режалаштирмоқда.
Лойиҳа вилоят ҳокими Хайрулло Бозоровнинг компания директори Цюли Лю билан учрашувида муҳокама қилинди. Бу ҳақда Фарғона вилояти ҳокимлиги хабар берди.
Музокаралар якунларига кўра, томонлар лойиҳа таклифларини амалий босқичга ўтказиш ва ушбу йўналишдаги ҳамкорликни давом эттиришга келишиб олди.
Jinan Fengmian Machinery Equipment Co., Ltd. компанияси 2012 йилда Хитойнинг Шаньдун вилоятидаги Цзинань шаҳрида ташкил этилган.
Компания хом пахтани қайта ишлаш учун технологик ускуналарни лойиҳалаш, ишлаб чиқариш ва етказиб беришга ихтисослашган.
Корхона ўзининг ишлаб чиқариш қувватлари ва муҳандислик-техник салоҳиятига эга. Шунингдек, компания халқаро бозорларга, жумладан, Марказий Осиё мамлакатларига ускуналар етказиб бериш тажрибасига эга.
Фарғона вилоятида Хитой инвесторлари билан турли соҳаларда қўшма лойиҳалар амалга оширилмоқда. Ҳудудий ҳокимлик вакиллари янги ҳамкорларнинг вилоятдаги мавжуд инвестиция имкониятларига қизиқиши ортиб бораётганини таъкидламоқда.
