Бахтиёр Саидов: Ўзбекистон ислом оламида бирдамлик, мулоқот ва адолат тамойилларини қўллаб-қувватлайди
Тошкент, Ўзбекистон (UzDaily.uz) — 2025 йил 21 июнь куни Туркиянинг Истанбул шаҳрида бўлиб ўтган Ислом ҳамкорлик ташкилоти (ИҲТ) Ташқи ишлар вазирлари кенгашининг 51-сессиясида Ўзбекистон Республикаси ташқи ишлар вазири Бахтиёр Саидов иштирок этди.
Сессия якуни бўйича ўзининг расмий Telegram-каналида баёнот билан чиққан Бахтиёр Саидов бу тадбирнинг ўта мураккаб ва таранг халқаро вазият шароитидаги аҳамиятини алоҳида таъкидлади.
«Биз жуда мураккаб геосиёсий вазиятда йиғилдик. Шу пайтда умумий саъй-ҳаракатларни бирлаштириш ва дипломатик механизмлар асосида конструктив ечимлар ишлаб чиқиш жуда муҳим. Ўзбекистон ҳар доим мулоқот ва тинч музокаралар тарафдори бўлиб келган ва шундай бўлиб қолади», — деди вазир.
Унинг таъкидлашича, Марказий Осиё минтақаси ҳозирги кунгача ҳамжиҳатлик ва бир-бирини тушунишга асосланган ечимларни топишда юқори даражадаги салоҳиятини кўрсатди.
Саидов таъкидлаган асосий нуқталардан бири — Ўзбекистоннинг ислом дунёсидаги ўрни ва унинг бирдамлик, адолат ҳамда мулоқот тамойилларига содиқлиги бўлди. У айниқса, бу тамойилларнинг аҳамияти дунёдаги зиддиятлар ва инқирозлар кучайиб бораётган шароитда янада ортиб бораётганини қайд этди.
«Биз яна бир бор тинчликка содиқлигимизни, халқаро ҳуқуқни ҳурмат қилиш ва инсон қадр-қимматини ҳимоя қилишга қаратилган гуманитар ташаббусларни қўллаб-қувватлашни қатъий баён этдик», — деди Ўзбекистон ташқи ишлар вазири ўз баёнотида.
Саидов сўзининг якунида ИҲТ доирасидаги ҳамкорликни янада мустаҳкамлаш, ислом оламида ўзаро ишонч ва ҳурмат асосидаги сиёсий мулоқотни кучайтириш зарурлигини таъкидлади.
