Apex Insurance 2026 йил I чорак лидери бўлди

Тошкент, Ўзбекистон (UzDaily.uz) — 2026 йилнинг биринчи чораги якунларига кўра, Ўзбекистон суғурта сектори юқори ўсиш суръатларини намоён этди.

Умумий суғурта сегментида йиғилган суғурта мукофотларининг жами ҳажми 3,7 трлн сўмга етди. Бу кўрсаткич ўтган йилнинг мос даврига нисбатан 53,6 фоизга ошган. Бозорда етакчи учта компания жами соҳа ҳажмининг 47,5 фоизини назорат қилди.

Умумий суғурта соҳасидаги рейтингда мутлақ етакчиликни Apex Insurance эгаллади. Компания бозорда биринчи бўлиб муҳим маррани босиб ўтиб, 1,0 трлн сўмлик суғурта мукофотларини йиғишга эришди. Бу ўтган йилга нисбатан 42,9 фоизлик ўсишни англатади. Компаниянинг маҳаллий бозордаги улуши 28 фоизга етди.

Иккинчи ўринни O'zbekinvest эгаллади. Компаниянинг суғурта мукофотлари ҳажми 412,5 млрд сўмни ташкил этиб, йиллик ўсиш 41,8 фоизни ташкил қилди. Бозордаги улуши эса 11 фоизга тенг бўлди.

Кучли учликни Kafolat sug'urta якунлади. Компания суғурта мукофотлари бўйича 406,6 млрд сўм натижа қайд этиб, ўтган йилга нисбатан 185,4 фоизлик рекорд ўсишга эришди. Натижада унинг бозордаги улуши ҳам 11 фоизни ташкил қилди.

Ҳаёт суғуртаси сегментида ҳам инвестицион ва операцион фаоллиги юқори бўлган компаниялар ажралиб турди.

Ушбу йўналишда Apex Life Insurance етакчилик қилди. Компания биринчи чорак якунига кўра 238,3 млрд сўм суғурта мукофотларини жамлади. Бу ўтган йилнинг шу даврига нисбатан 41,3 фоизга юқори кўрсаткич ҳисобланади.

Иккинчи ўринни Alfa Life Insurance эгаллади. Компаниянинг мукофотлар йиғими 15,2 млрд сўмни ташкил этиб, йиллик ўсиш суръати 102,3 фоизга етди.

Учинчи ўринда Prestige Insurance жойлашди. Компания ҳисобот даврида 8,2 млрд сўмлик суғурта мукофотларини йиғди.