Афғонистонлик автомобил сотувчилари Ўзбекистон автомобил бозорини ўрганмоқдалар
Тошкент, Ўзбекистон (UzDaily.uz) — Ўзбекистон автомобиллари Афғонистон бозорида янада кенг ўрин эгаллаши мумкин.
Шу мақсадда Афғонистоннинг автомобил савдоси соҳасида фаолият юритувчи 30 дан ортиқ йирик тадбиркор мамлакатимизга ташриф буюрди.
Ўзбекистон Савдо-саноат палатаси ҳамда Тошкент шаҳар ҳокимлиги ташаббуси билан ташкил этилган мазкур ташриф доирасида меҳмонлар маҳаллий автодилерлик марказлари, автомобил бозорлари ва экспортёр компаниялар фаолияти билан яқиндан танишади.
Ташрифнинг энг муҳим қисми эса — B2B учрашувлари. Унда икки давлат тадбиркорлари автомобиллар экспортини кенгайтириш, логистика, дилерлик тармоғини ривожлантириш ва янги савдо шартномаларини имзолаш истиқболларини муҳокама қилади.
