Тошкент, Ўзбекистон (UzDaily.uz) — ADM Jizzakh ва Жанубий Кореянинг DK&G Co муҳандислик компанияси гибрид ва электр автомобилларини ишлаб чиқариш учун саноат ускуналарини етказиб бериш ва ўрнатиш бўйича келишув имзолади.
Лойиҳага киритиладиган инвестицияларнинг умумий ҳажми тахминан 100 млн долларни ташкил этади. Корхонада Chery, Haval ва Changan брендлари остидаги автомобиллар ишлаб чиқарилади. Бу ҳақда ADM Global хабар берди.
Ҳозирда ADM Jizzakh ҳудудида янги ишлаб чиқариш мажмуаси қурилмоқда. Ишлаб чиқариш CKD технологияси, яъни автомобилларни йирик узеллардан эмас, балки алоҳида қисмлардан йиғиш усули асосида ташкил этилади. Жараён кузовни пайвандлаш ва бўяшдан тортиб, автомобилни якуний йиғиш ҳамда тайёр маҳсулот сифатини назорат қилишгача бўлган тўлиқ циклни қамраб олади.
Мажмуанинг муҳим хусусиятларидан бири — турли брендларга мансуб автомобилларни ягона ишлаб чиқариш линиясида тайёрлаш имкониятидир.
Бундай ечим ADM Jizzakh ва DK&G Co муҳандислари ҳамкорлигида ишлаб чиқилади. Универсал конвейер ишлаб чиқариш жараёнини турли хил гибрид ва электр автомобиллари моделларига мослаштириш имконини беради.
DK&G Co аввал ҳам ADM Jizzakh’нинг амалдаги CKD ишлаб чиқариш корхонасини ускуналар билан жиҳозлашда иштирок этган. Ҳозирда ушбу корхонада ички ёнув двигателига эга Kia автомобиллари ишлаб чиқарилмоқда.
Жанубий Корея компанияси буюртмачиларнинг индивидуал талабларига мувофиқ саноат ускуналарини лойиҳалаш ва ишлаб чиқариш бўйича кўп йиллик тажрибага эга.
Янги энергия манбаларида ҳаракатланувчи автомобиллар (NEV) ишлаб чиқаришни ривожлантириш ADM Global компаниясининг стратегик устувор йўналишларидан бири ҳисобланади.
Компания Ўзбекистон бозорига гибрид ва электр автомобилларининг бир нечта янги моделларини олиб чиқишни ҳамда маҳаллий ишлаб чиқарилган бутловчи қисмлар улушини босқичма-босқич оширишни режалаштирмоқда.
