Toshkentda Zamonaviy sanʼat markazi ochiladi

Toshkent, O’zbekiston (UzDaily.uz) —  6 sentyabr kuni Toshkentda CCA Tashkent Zamonaviy sanʼat markazi ochiladi.

Yangi madaniy loyiha 100 yildan ortiq tarixga ega bo‘lgan tarixiy binoda joylashadi hamda zamonaviy sanʼat, taʼlim, tadqiqotlar va jamoat tashabbuslarini birlashtiradi.

Bino 1912 yilda meʼmor Vilgelm Geynselman loyihasi asosida qurilgan. Dastlab u tramvay deposi sifatida foydalanilgan, keyinchalik dizel elektr stansiyasiga aylangan.

Loyihani amalga oshirish jarayonida binoga xos tarixiy qiyofa va uning sanoat muhiti saqlab qolindi, binoga esa yangi funksional vazifa berildi.

Loyiha davlat rahbari tashabbusi bilan amalga oshirilmoqda. U tarixiy merosni asrab-avaylash bilan bir vaqtda zamonaviy madaniy infratuzilma yaratishga qaratilgan.

Meʼmoriy konsepsiya Fransiyaning Studio KO byurosi tomonidan ishlab chiqilgan. Unda tarixiy meʼmorlikni sanʼat, taʼlim va jamoat faoliyati uchun mo‘ljallangan zamonaviy makonlar bilan uyg‘unlashtirish ko‘zda tutilgan.

Markaz tarkibida ko‘rgazma zallari, taʼlim va jamoat maydonlari, kutubxona hamda tadqiqot infratuzilmasi faoliyat yuritadi.

Zamonaviy sanʼat ko‘rgazmalaridan tashqari, maydonda maʼruzalar, kino namoyishlari, muhokamalar, tadqiqot loyihalari, konsertlar va performanslar o‘tkaziladi.

Loyiha yaratuvchilari CCA Tashkent‘ni nafaqat ko‘rgazma maydoni, balki madaniy muloqot va hamkorlik uchun makon sifatida ham ko‘rishmoqda.

O‘tmishda energiya ishlab chiqarish bilan bog‘liq bo‘lgan tarixiy bino endi yangi ijodiy g‘oyalar va madaniy tashabbuslar uchun maydonga aylanishi kerak.

Zamonaviy sanʼat markazi Toshkentdagi yangi madaniy maskanlardan biriga aylanishi hamda zamonaviy sanʼat va Markaziy Osiyodagi madaniy-taʼlimiy loyihalar rivojiga hissa qo‘shishi kutilmoqda.