Toshkent, O’zbekiston (UzDaily.uz) — 2027 yil mart oyida Rossiyadagi “Rossiya” Milliy markazi maydonlarida O‘zbekiston kunlari o‘tkaziladi.
Bu haqda markaz bosh direktori Natalya Virtuozova O‘zbekistondagi Islom sivilizatsiyasi markazi direktori Firdavs Abduxoliqov bilan uchrashuvda maʼlum qildi.
«Biz — „Rossiya“ Milliy markazi — kelgusi yil mart oyida markazimiz maydonlarida O‘zbekiston kunlarini o‘tkazishni taklif qilamiz», — dedi Virtuozova. Uning so‘zlariga ko‘ra, tadbirlarni tashkil etish uchun barcha zarur maydonlar taqdim etiladi.
Uchrashuv yakunida tomonlar tegishli memorandumni imzoladilar. Firdavs Abduxoliqov, shuningdek, O‘zbekiston madaniy merosini o‘rganish, asrash va ommalashtirish bo‘yicha Butunjahon jamiyati (WOSCU) boshqaruvi raisi hisoblanadi.
Rossiya va O‘zbekistonning o‘zaro madaniyat kunlarini 2027 yilda o‘tkazish rejalashtirilgan.
“Rossiya” Milliy markazi 25 avgust kuni xabar berganidek, tadbirlar ikki mamlakat o‘rtasida diplomatik munosabatlar o‘rnatilganining 35 yilligiga bag‘ishlanadi.
