Raqobat qo‘mitasi Perfectum operatorining 50 foiz ulushi sotilishini maʼqulladi

Toshkent, O’zbekiston (UzDaily.uz) — Raqobatni rivojlantirish va isteʼmolchilar huquqlarini himoya qilish qo‘mitasi Perfectum brendi ostida faoliyat yurituvchi Rubicon Wireless Communication kompaniyasining 50 foiz ulushini sotib olish bo‘yicha bitimni maʼqulladi. Bu haqda idora matbuot xizmati xabar qildi.

Qo‘mita fuqaro F. Mamatdjanovning iqtisodiy konsentratsiya bo‘yicha bitimni kelishish haqidagi arizasini ko‘rib chiqdi. Murojaatga ko‘ra, ariza beruvchi Rubicon Wireless Communication kompaniyasining 50 foiz ulushini sotib olishni rejalashtirmoqda.

Ko‘rib chiqish yakunlariga ko‘ra, maxsus komissiya mazkur bitim raqobat muhitiga salbiy taʼsir ko‘rsatmaydi, degan xulosaga keldi va uni kelishish to‘g‘risida qaror qabul qildi.

Korxonalar va tashkilotlarning Yagona davlat reyestri maʼlumotlariga ko‘ra, hozirgi vaqtda Rubicon Wireless Communication kompaniyasining 50 foiz ulushi Abdumalik Iminovga tegishli. Kompaniyaning yana 37,5 foiziga xorijiy IMC-Capital kompaniyasi, qolgan 12,5 foiziga esa Kamron Akbarov egalik qiladi.

2024 yil mart oyida Perfectum kompaniyasining 100 foizi Abdumalik Iminov nazoratiga o‘tgani haqida maʼlumotlar tarqalgan edi. Biroq kompaniyaning sotilishi haqidagi maʼlumotlar ochiq manbalarda yoki Davlat aktivlarini boshqarish agentligining axborot resurslarida eʼlon qilinmagan. Operatorni xususiylashtirishga tayyorgarlik ishlari 2020 yildan buyon davom etayotgan edi.

2024 yil oxirida IMC-Capital va Kamron Akbarov Rubicon Wireless Communication taʼsischilari tarkibiga kirdi. Shu bilan bir vaqtda kompaniyaning ustav kapitali 17 barobardan ortiq oshirilib, 304,62 milliard so‘mga yetkazildi.

2024 yil avgust oyida Prezident bilan o‘tkazilgan ochiq muloqotda Infinbank majoritar aksiyadori va Uztex to‘qimachilik kompaniyasi asoschisi Farhod Mamatdjanov Britaniyaning Vodafone kompaniyasi ishtirokida yangi telekommunikatsiya loyihasini amalga oshirish rejalari haqida maʼlum qilgan edi. Uning so‘zlariga ko‘ra, loyiha Perfectum negizida Uzcard bilan hamkorlikda kompaniyani rivojlantirishni nazarda tutadi.

O‘sha paytda loyihada uskuna va texnologiyalar yetkazib beruvchisi sifatida Finlyandiyaning Nokia kompaniyasi ishtirok etishi rejalashtirilgani ham maʼlum qilingan edi. Mamatdjanovning taʼkidlashicha, loyihaning umumiy investitsiya hajmi 250 million yevroga baholanmoqda. Shundan 100 million yevroni Finlyandiya eksport agentligi ko‘magida “O‘zsanoatqurilishbank” orqali jalb qilish, yana 150 million yevroni esa loyiha taʼsischilari taʼminlashi rejalashtirilgan.