Toshkent, O’zbekiston (UzDaily.uz) — Qashqadaryo viloyati delegatsiyasi Xitoy hamkorlari bilan biznes-jarayonlar autsorsingi (BPO), sunʼiy intellekt va taʼlim sohalaridagi hamkorlik istiqbollarini muhokama qildi.
Muzokaralar Anxoy provinsiyasining maʼmuriy markazi Xefey shahrida bo‘lib o‘tdi. Unda O‘zbekiston vakillari hududning investitsiyaviy va texnologik imkoniyatlarini taqdim etdilar.
Viloyat hokimligi ishtirokida shakllantirilgan delegatsiya tarkibidan Raqamli texnologiyalar vazirligining hududiy boshqarmasi, Qashqadaryodagi IT Park filiali, Qarshi davlat universiteti va Qarshi davlat texnika universiteti vakillari o‘rin oldi. Ishbilarmonlik uchrashuvi Anxoy provinsiyasi Savdo departamenti tomonidan tashkil etildi.
Departamentning II darajali katta inspektori Yuy Syaogao bilan o‘tkazilgan muzokaralarda tomonlar hududlararo hamkorlik istiqbollari yuzasidan fikr almashdilar.
BPO xizmatlarini rivojlantirishga alohida eʼtibor qaratildi. Zhengde Human Resources kompaniyasi ijrochi prezidenti Szyan Xua bilan uchrashuvda xalqaro buyurtmachilar uchun biznes-jarayonlarni masofadan turib bajara oladigan mutaxassislarni tayyorlash hamda bunday faoliyatni Qashqadaryo viloyatida yo‘lga qo‘yish imkoniyatlari muhokama qilindi.
Taʼlim sohasi ham muzokaralarning muhim yo‘nalishlaridan biri bo‘ldi. Hefei University of Technology vakillari bilan talabalar va o‘qituvchilar almashinuvini yo‘lga qo‘yish, qo‘shma taʼlim dasturlarini ishga tushirish, axborot texnologiyalari va sunʼiy intellekt sohalarida malaka oshirish kurslarini tashkil etish masalalari ko‘rib chiqildi.
Uchrashuv ishtirokchilari davlat xizmatchilarini sunʼiy intellekt vositalaridan foydalanishga o‘rgatish masalasini ham muhokama qildilar.
Bundan tashqari, delegatsiya universitetning amaliy ko‘nikmalarga ega mutaxassislarni tayyorlash va taʼlim dasturlarini sanoat ehtiyojlariga moslashtirish bo‘yicha tajribasi bilan tanishdi.
Sungrow Power Supply kompaniyasi vakili bilan uchrashuvda sunʼiy intellekt hisoblash markazlari bilan bog‘liq loyihalar haqida qo‘shimcha maʼlumot olish va ularni amalga oshirish shartlarini aniqlashtirish masalalari ko‘rib chiqildi.
Tashrif dasturi doirasida delegatsiya Yaoxay tumaniga ham bordi. U yerda robotlar uchun maʼlumotlar tayyorlash va ularni amaliy harakatlarni bajarishga o‘rgatish maydonchasi, shuningdek, aniq ishlov berish markazi faoliyati bilan tanishdi.
Mahalliy boshqaruv organlari va texnologik korxonalar vakillari ishtirokida o‘tkazilgan davra suhbatida IT va BPO xizmatlarini rivojlantirish, kadrlar tayyorlash hamda to‘g‘ridan-to‘g‘ri ishbilarmonlik aloqalarini o‘rnatish imkoniyatlari muhokama qilindi.
Uchrashuvlar yakunida O‘zbekiston tomoni aniq loyihalar asosida hamkorlikni davom ettirishdan manfaatdor ekanini taʼkidladi. Shuningdek, hamkorlik yo‘nalishlarini yana-da batafsil ishlab chiqish uchun xitoylik hamkorlar Qashqadaryo viloyatiga tashrif buyurishga taklif qilindi.
