Oʻzbekistonlik startap Lidavex Startup World Cup gʻolibi

Toshkent, O‘zbekiston (UzDaily.uz) — O‘zbekistonlik asoschi — Kamola Mirjalilova tomonidan yaratilgan startap dunyoga mashhur Startup World Cup’ning mintaqaviy bosqichida g‘olib chiqdi.

G‘olib startap Lidavex bo‘lib, u ona va bola salomatligi yo‘nalishidagi ilg‘or MedTech kompaniya hisoblanadi. Startap “dunyodagi birinchi servikal ma’lumotlar infratuzilmasi”ni yaratishni maqsad qilgan. Uning asosiy qurilmasi CerviLite LiDAR texnologiyasi orqali tug‘uruq jarayonida real vaqt rejimida muhim tibbiy ma’lumotlarni yig‘adi. Ushbu ma’lumotlar sun’iy intellektni o‘qitish uchun ishlatiladi va servikal saratonni aniqlash, fertilitet monitoringi hamda perimenopauza davrini kuzatish kabi yo‘nalishlarda qo‘llaniladi.

Startap allaqachon JPMorgan portfel dasturlari, Stanford Biodesign, Google va ULP kabi global tashkilotlar tomonidan qo‘llab-quvvatlanmoqda hamda xalqaro sog‘liqni saqlash integratori InterSystems bilan hamkorlik qilmoqda.

Tanlov turli soha va bosqichdagi ko‘plab startaplarni birlashtirdi. Tashkilotchilarga ko‘ra, yakuniy qaror bir ovozdan qabul qilingan — bu esa Lidavex g‘oyasi va kengayish salohiyatiga yuqori ishonch mavjudligini ko‘rsatadi. Startup World Cup ishtirokchilarining atigi 0.4 foizi mintaqaviy g‘olibga aylanadi, bu esa ushbu natija qanchalik noyob va raqobatbardosh ekanini anglatadi.

Tadbir davomida hatto hakamlardan biri, reper OG Arabian Prince (Dr. Dre va Ice Cube’ning N.W.A. guruhi sobiq a’zosi) o‘zining Innov8 Capital fondi orqali investitsiya qilishga qiziqish bildirgani qayd etildi.

Lidavex, shuningdek, InterSystems bilan enterprise integratsiyalarini rivojlantirmoqda. Ushbu tizim AQShdagi ko‘plab shifoxonalarni bog‘laydi va kompaniya Sub-Saharan Afrikada ona salomatligi yechimlarini kengaytirish bo‘yicha global tashabbuslar bilan ham muzokaralar olib bormoqda.

Ushbu g‘alaba orqali Lidavex 2026-yil 6-noyabr kuni San-Fransiskoda bo‘lib o‘tadigan Startup World Cup Grand Finalida mintaqani himoya qiladi. U yerda dunyo bo‘ylab 100 dan ortiq mintaqaviy g‘oliblar $1 millionlik bosh sovrin uchun kurashadi.