O'zbekistonlik hunarmandlar Homo Faberda o'z ishlarini namoyish etishdi
Toshkent, O’zbekiston (UzDaily.uz) — O‘zbekistonlik hunarmandlarning ishlari Venetsiyada o‘tkazilayotgan zamonaviy badiiy hunarmandchilikka bag‘ishlangan Homo Faber 2026: An Island of Light xalqaro ko‘rgazmasida namoyish etilmoqda. Ekspozitsiyada 70 mamlakat vakillari ishtirok etmoqda, ko‘rgazmada jami 700 dan ortiq asar taqdim etilgan. Bu haqda O‘zbekiston Madaniyat va sanʼatni rivojlantirish jamg‘armasi xabar berdi.
O‘zbekiston ekspozitsiyasidan Sanjar Kubayev va Alisher Nazirovning Moonjars nomli keramik asarlari, shuningdek, Shavkiddin Kamolovning badiiy qaychilari o‘rin olgan.
O‘zbekiston ko‘rgazmaning taʼlim dasturida ham ishtirok etmoqda. Diyorobek Abdullayev va Sabina Jo‘rayeva Homo Faber 2026 doirasida Young Ambassadors dasturining mediatorlari sifatida qatnashmoqda.
O‘zbekistonlik hunarmandlarning ushbu tadbirdagi ishtiroki O‘zbekiston Madaniyat va sanʼatni rivojlantirish jamg‘armasining Michelangelo Foundation bilan hamkorligining davomi bo‘ldi. Tashkilotlar o‘rtasidagi hamkorlik 2023 yilda Buxoroda Homo Faber Guide‘ning O‘zbekistonga bag‘ishlangan bo‘limini ishga tushirishdan boshlangan.
O‘zbekistonning ishtirok dasturi doirasida Madina Qosimboyeva tomonidan anʼanaviy so‘zana kashtachiligiga bag‘ishlangan mahorat darslari ham o‘tkaziladi.
Bu yil Homo Faber 70 mamlakatdan 500 dan ortiq ustalarni birlashtirib, zamonaviy badiiy hunarmandchilikning 700 dan ziyod asarini namoyish etmoqda.
