O‘zbekistonda «Lazgi va Avesto» muzeyi tashkil etiladi

Toshkent, O‘zbekiston (UzDaily.uz) — O‘zbekiston Vazirlar Mahkamasi 2026 yil 12 may kuni Urganch shahrida «Lazgi va Avesto» muzeyini tashkil etish to‘g‘risida qaror qabul qildi.

Hujjatga muvofiq, Xonqa ko‘chasi, 7-uy manzilida yangi muassasa O‘zbekiston Zamonaviy sanʼat muzeyining filiali sifatida tashkil etiladi.

Muzeyni tashkil etishdan asosiy maqsad madaniy merosning ikki muhim qatlamini — YUNESKOning insoniyat nomoddiy madaniy merosi ro‘yxatiga kiritilgan Xorazm lazgi raqsi va qadimiy diniy yodgorlik hisoblangan “Avesto”ning tarixiy merosini saqlash hamda ommalashtirishdan iborat.

Qarorda muassasaning tarbiyaviy vazifasiga ham alohida eʼtibor qaratilgan. Nodir eksponatlar orqali fuqarolarda, ayniqsa yosh avlodda milliy va umuminsoniy qadriyatlarga hurmat, Vatanga muhabbat va faxr tuyg‘usini shakllantirish ko‘zda tutilgan.

Hukumat muzeyning asosiy vazifalari qatoriga fondlarni shakllantirish va boyitish, zamonaviy axborot texnologiyalari asosida ekspozitsiyalar tashkil etish, kolleksiyalarni xalqaro miqyosda targ‘ib qilish, shuningdek, xorijiy muzeylar bilan hamkorlikni rivojlantirish va qo‘shma ko‘rgazma loyihalarida ishtirok etishni kiritdi.

Muassasani moliyalashtirish Xorazm viloyati mahalliy byudjeti mablag‘lari, muzeyning o‘z daromadlari, jismoniy va yuridik shaxslarning xayriya mablag‘lari, shuningdek, qonunchilikda taqiqlanmagan boshqa manbalar hisobidan amalga oshiriladi.

2026 yilda muzeyni saqlash xarajatlari, jumladan xodimlar mehnatiga haq to‘lash xarajatlari, Xorazm viloyati byudjeti uchun tasdiqlangan parametrlar doirasida qoplanadi. 2027 yildan boshlab esa moliyalashtirish viloyat byudjetiga rejali asosda kiritib boriladi.

Xorazm viloyati hokimligiga 2026 yil 1 iyulga qadar binoda taʼmirlash ishlarini yakunlash, ekspozitsiyani shakllantirish va muzeyni zarur moddiy-texnik baza bilan jihozlash topshirildi.

Madaniy meros agentligi viloyat hokimligi va manfaatdor idoralar bilan birgalikda shtat jadvalini tasdiqlashi, muzeyni malakali kadrlar bilan taʼminlashi, zamonaviy axborot-kommunikatsiya texnologiyalarini joriy etishi hamda mahalliy va xorijiy turistlarni jalb etishni taʼminlashi lozim.

\