Toshkent, O’zbekiston (UzDaily.uz) — ICT WEEK Uzbekistan 2026 doirasida O‘zbekiston raqamli texnologiyalar vaziri Sherzod Shermatov APT Satellite Company Limited (APSTAR) ijrochi direktori va prezidenti Van Xunbin bilan uchrashdi.
Tomonlar sunʼiy yo‘ldosh aloqasini rivojlantirish, telekommunikatsiya infratuzilmasini takomillashtirish va Markaziy Osiyoda hamkorlikni kengaytirish masalalarini muhokama qildi.
Uchrashuvda O‘zbekistonda sunʼiy yo‘ldosh aloqasi bozorini rivojlantirish istiqbollari, APT Satellite kompaniyasining mamlakatdagi biznes rejalari, shuningdek, milliy telekommunikatsiya infratuzilmasini rivojlantirish uchun kompaniyaning amaldagi va kelajakdagi sunʼiy yo‘ldosh resurslaridan foydalanish imkoniyatlari ko‘rib chiqildi.
Muzokaralarning asosiy natijalaridan biri Sherzod Shermatov ishtirokida APT Satellite va UZ-SAT o‘rtasida hamkorlik to‘g‘risidagi kelishuvning imzolanishi bo‘ldi. Hujjat sunʼiy yo‘ldosh aloqasi va raqamli infratuzilma sohalarida amaliy hamkorlikni rivojlantirishni nazarda tutadi.
Tomonlar APT Satellite va UZ-SAT o‘rtasidagi amaldagi hamkorlik hamda qo‘shma ishlarning istiqbolli yo‘nalishlarini ham muhokama qildi. Xususan, APT Satellite sunʼiy yo‘ldosh resurslaridan sunʼiy yo‘ldosh aloqasi xizmatlari, keng polosali internetga ulanish, televideniye va radioeshittirish, shuningdek, boshqa telekommunikatsiya va raqamli xizmatlarni ko‘rsatish uchun foydalanish masalalari muhokama qilindi.
APT Satellite vakillari kompaniyaning sunʼiy yo‘ldoshlar guruhini yana-da rivojlantirish hamda zamonaviy texnologiyalardan foydalangan holda yangi apparatlarni uchirish rejalari bilan tanishtirdi.
Uchrashuv yakunida sunʼiy yo‘ldosh resurslarini kengaytirish Markaziy Osiyoda sunʼiy yo‘ldosh aloqasini rivojlantirish va tegishli xizmatlar sifatini oshirish uchun qo‘shimcha imkoniyatlar yaratishi taʼkidlandi.
Shuningdek, mintaqada sunʼiy yo‘ldosh infratuzilmasini yana-da rivojlantirish, xalqaro aloqa imkoniyatlarini kengaytirish hamda APT Satellite, UZ-SAT va O‘zbekiston tomonining istiqbolli qo‘shma loyihalariga alohida eʼtibor qaratildi.
