Toshkent, O’zbekiston (UzDaily.uz) — O‘zbekistonda aholi punktlarining mobil aloqa tarmoqlari bilan qamrovi 99,5 foizga yetdi. Xalqaro avtomobil yo‘llarining esa 95,5 foizi mobil internet bilan taʼminlangan.
Bu haqda raqamli texnologiyalar vaziri Sherzod Shermatov «Raqamli O‘zbekiston — 2030» strategiyasining maqsadli ko‘rsatkichlari bajarilishi yuzasidan parlament so‘roviga bergan javobida maʼlum qildi. Oliy Majlis Qonunchilik palatasi vazirning javobini maʼlumot uchun qabul qildi.
Vazirning maʼlumotlariga ko‘ra, 2026 yil boshidan buyon mamlakatda 11 mingdan ortiq mobil aloqa bazaviy stansiyasi o‘rnatildi. Ularning umumiy soni 110,5 mingtaga yetdi.
So‘nggi yillarda magistral tarmoqlarning o‘tkazuvchanlik quvvati ham oshdi. 2020 yilga nisbatan viloyatlar kesimida bu ko‘rsatkich 400 Gbit/s dan 600 Gbit/s gacha, tumanlar kesimida esa 40 Gbit/s dan 60 Gbit/s gacha o‘sdi.
Ijtimoiy obyektlarni yuqori tezlikdagi internetga ulash ishlari davom etmoqda. Hozirgi vaqtda xalq taʼlimi tizimidagi 10 657 ta obyekt, 6 988 ta maktabgacha taʼlim tashkiloti, 5 786 ta sog‘liqni saqlash obyekti, 8 935 ta mahalla fuqarolar yig‘ini va ichki ishlar organlarining 5 250 ta tayanch punkti yuqori tezlikdagi maʼlumot uzatish tarmoqlari bilan qamrab olingan.
Optik tolali infratuzilma ham sezilarli darajada kengaydi. 2020 yilda optik tolali aloqa liniyalarining umumiy uzunligi 119,5 ming kilometrni tashkil etgan bo‘lsa, hozirda bu ko‘rsatkich 397 ming kilometrga yetdi. Bunday tarmoqlar mamlakat aholi punktlarining 98,1 foizini qamrab olgan. 2026 yil oxiriga qadar ushbu ko‘rsatkichni 98,2 foizga yetkazish rejalashtirilgan.
Vazirning maʼlumotlariga ko‘ra, O‘zbekiston mobil internet tezligi bo‘yicha xalqaro reytingdagi o‘rnini yaxshilab, 133-o‘rindan 72-o‘ringa ko‘tarildi. Qatʼiy ulanish orqali taqdim etiladigan internet tezligi reytingida esa mamlakat 112-o‘rindan 73-o‘ringa ko‘tarilib, Markaziy Osiyo davlatlari orasida birinchi o‘rinni egalladi.
Strategiyaning yana bir maqsadli ko‘rsatkichi xalqaro internet tarmoqlariga ulanishning o‘tkazuvchanlik quvvatiga taalluqli. 2020 yilda bu ko‘rsatkich 1 200 Gbit/s ni tashkil etgan. Investitsiya loyihalarini amalga oshirish va tashqi internet kanallarini diversifikatsiya qilish natijasida uning quvvati 4 400 Gbit/s ga yetdi. 2026 yil oxiriga qadar ushbu ko‘rsatkichni 4 500 Gbit/s gacha oshirish rejalashtirilgan. 2030 yil uchun maqsadli ko‘rsatkich esa 5 000 Gbit/s etib belgilangan.
Muhokama davomida deputatlar amalga oshirilayotgan ishlarni xolis baholash, mavjud muammolarni bartaraf etish va «Raqamli O‘zbekiston — 2030» strategiyasi ko‘rsatkichlariga o‘z vaqtida erishish bo‘yicha takliflar bildirdilar. Yig‘ilish yakunida vazirning parlament so‘roviga bergan javobi maʼlumot uchun qabul qilindi.
