Oʻzbekiston va Meta raqamli iqtisodiyot va sunʼiy intellektni muhokama qilishdi

Toshkent, O‘zbekiston (UzDaily.uz) — Raqamli texnologiyalar vaziri Sherzod Shermatov Meta kompaniyasi vakillari bilan uchrashuv o‘tkazdi. Unda Meta kompaniyasining Markaziy Osiyo va Shri-Lanka bo‘yicha davlat siyosati rahbari Senura Abeywardena hamda Markaziy Osiyo va Mongoliya bo‘yicha mintaqaviy davlat siyosati bo‘yicha hamkor Yerassyl Kalikhan ishtirok etdi.

Uchrashuv davomida raqamli platformalar va yangi texnologiyalarni tartibga solish, raqamli boshqaruv bo‘yicha ilg‘or xalqaro tajribalarni o‘rganish hamda O‘zbekistonda raqamli iqtisodiyotni rivojlantirish masalalari muhokama qilindi.

Shuningdek, yoshlarning raqamli ko‘nikmalarini oshirish, sun’iy intellekt bo‘yicha bilim va malakasini rivojlantirish yuzasidan fikr almashildi.

Dastlab tomonlar onlayn xavfsizlikni ta’minlash, ayniqsa yosh foydalanuvchilarni himoya qilish, xabardorlik dasturlarini amalga oshirish hamda davlat-xususiy sheriklik asosida qo‘shma tashabbuslarni rivojlantirish istiqbollarini ham ko‘rib chiqdilar.

Uchrashuv yakunida innovatsiyalar va startap ekotizimini qo‘llab-quvvatlash, bilim almashish hamda institutsional hamkorlikni kengaytirish bo‘yicha kelgusidagi hamkorlik yo‘nalishlari belgilab olindi.