Toshkent, O’zbekiston (UzDaily.uz) — IT Park O‘zbekiston global o‘sish yo‘nalishi rahbari Izzat Hamidov 2027 yildan boshlab tashkilot Land of Startups deb nomlangan, bozorga chiqish bo‘yicha global dasturni ishga tushirishini maʼlum qildi. Qiymati 5 million dollar bo‘lgan mukofot jamg‘armasi butun dunyodan tanlab olinadigan 25 nafar g‘olib — startap asoschilari uchun mo‘ljallangan. Ular moliyalashtirish oladi va to‘g‘ridan-to‘g‘ri O‘zbekiston bozoriga joylashtiriladi. Bu haqda u Toshkentda ICT Week 2026 doirasida o‘tkazilgan Startup and Venture Summit sammitida maʼlum qildi.
Dastur mukofot jamg‘armasi 5 million dollar bo‘lgan amaldagi Prezident texnologiya mukofoti, shuningdek, raqamli startaplarni qo‘llab-quvvatlash dasturi bilan parallel ravishda amal qiladi. Mazkur dastur patentlar, mentorlar va akseleratorlar uchun xarajatlarni qoplaydi hamda tasdiqlangan MVPlar uchun 50 ming dollargacha miqdorda NIOKR vaucherlarini taqdim etadi.
Hamidovning so‘zlariga ko‘ra, so‘nggi oylarda O‘zbekistonning suveren kredit reytingi S&P, Moody‘s va Fitch agentliklari tomonidan oshirilgan, uchala agentlik ham mamlakat bo‘yicha barqaror prognoz bergan.
Mamlakat Jahon bankining GovTech yetuklik indeksi bo‘yicha dunyodagi eng yuqori ko‘rsatkichga ega 10 ta davlat qatoriga kiradi, shuningdek, biznes yuritish qulayligi bo‘yicha ham kuchli o‘nlikdan joy olgan. Xorijiy investorlar mamlakatda biznesning 100 foiziga egalik qilishi, kapitalning chegara orqali erkin harakatlanishi mumkin. 2017 yildan buyon to‘g‘ridan-to‘g‘ri xorijiy investitsiyalar hajmi qariyb 13 baravarga oshgan, tovar aylanmasi uch baravarga, YAIM esa yetti yil ichida ikki baravarga ko‘paygan.
Mamlakat aholisi 39 million kishini tashkil etadi, bu Markaziy Osiyo aholisining yarmiga teng. Aholining 65 foizi 35 yoshdan kichik. Har yili IT mutaxassisliklari bo‘yicha 25 mingdan ortiq bitiruvchi ekotizimga qo‘shilmoqda. Coursera‘ning raqamli ko‘nikmalar bo‘yicha global hisobotiga ko‘ra, O‘zbekiston generativ sunʼiy intellekt sohasida taʼlim olishda ayollarning ishtiroki bo‘yicha dunyoda birinchi o‘rinni egallaydi.
Joriy yilda StartupBlink platformasi O‘zbekistonni yil mamlakati va dunyodagi eng tez rivojlanayotgan startap ekotizimi deb atadi. Analitik Dealroom platformasi esa venchur investitsiyalarining o‘sish surʼatlari bo‘yicha O‘zbekistonni dunyoda birinchi o‘ringa qo‘ydi.
Mamlakatda allaqachon ikki “yunikorn” — Uzum va TBC Bank paydo bo‘lgan. Milliy platformada 1600 dan ortiq startap ro‘yxatdan o‘tgan bo‘lib, ularning 130 dan ortig‘i 28 ta mamlakatda xalqaro bozorlarga chiqqan. IT Park bozorga chiqish uchun xorijda oltita xab ochgan, ular hozirda butun dunyo bo‘ylab 150 dan ortiq kompaniyani qo‘llab-quvvatlamoqda.
Hamidov qo‘llab-quvvatlash tizimining asosiy elementi sifatida Enterprise Uzbekistan yurisdiksiyasini qayd etdi. U ingliz va Uels huquqi normalari asosida faoliyat yuritadi va 2100 yilgacha konstitutsiyaviy qonun bilan mustahkamlangan.
Ushbu yurisdiksiya doirasida korporativ, ijtimoiy, mol-mulk va yer soliqlari bo‘yicha nol stavkalar amal qiladi, shuningdek, import qilinadigan xizmatlarga QQS qo‘llanilmaydi. Kompaniyani ro‘yxatdan o‘tkazish uch kunni tashkil etadi.
Bozor uchun yangi bo‘lgan kompaniyalar uchun Zero Risk dasturi amal qiladi. U Toshkentdan tashqarida uch yilgacha bepul ofis joyi bilan taʼminlash, shuningdek, xodimlarning ish haqi va o‘qitish xarajatlarini qoplashni nazarda tutadi.
IT Park 2030 yilga qadar mamlakatning raqamli eksportini 5 milliard dollarga yetkazish, 300 mingta yuqori haq to‘lanadigan ish o‘rni yaratish va Enterprise Uzbekistan yurisdiksiyasiga mingta kompaniyani jalb qilishni rejalashtirmoqda.
