Toshkent, O’zbekiston (UzDaily.uz) — IT Park Uzbekistan Princeville Capital va Hypernova Capital kompaniyalari bilan O‘zbekiston texnologik kompaniyalariga xalqaro investitsiyalarni jalb qilish imkoniyatlarini muhokama qildi. Uchrashuv ICT WEEK Uzbekistan 2026 doirasida bo‘lib o‘tdi.
Muzokaralarda Princeville Capital hamkori Antoni Dou va Hypernova Capital boshqaruv hamkori Tugche Ergyul ishtirok etdi. Tomonlar O‘zbekiston startaplari uchun rivojlanishning turli bosqichlarida, yaʼni ilk bosqichdan o‘sish bosqichiga qadar investitsiya imkoniyatlarini ko‘rib chiqdi.
Muhokamaning asosiy yo‘nalishlaridan biri mahalliy venchur fondlar bilan koinvestitsiya mexanizmlari, O‘zbekiston startaplarining xalqaro investorlar tarmog‘iga kirishi va texnologik kompaniyalarni xorijiy bozorlarga olib chiqish masalalari bo‘ldi.
Princeville Capital va IT Park Uzbekistan vakillari sunʼiy intellekt sohasida istiqbolli startaplar oqimini shakllantirish imkoniyatlarini alohida muhokama qildi. Bunday loyihalar fondning investitsiya oqimiga kirishi va keyingi bosqichlarda xalqaro investorlarni jalb qilishi mumkinligi qayd etildi.
Hypernova Capital bilan O‘zbekiston venchur ekotizimiga Osiyodagi LP-investorlar kapitali jalb qilish masalasi muhokama qilindi. Uchrashuv ishtirokchilari mahalliy venchur fondlar va LP-investorlarning xalqaro tarmog‘i o‘rtasida aloqalar o‘rnatish, shuningdek, O‘zbekistonning Osiyo kapitali uchun jozibadorligini oshirish imkoniyatlarini ko‘rib chiqdi.
Bundan tashqari, tomonlar o‘zbekistonlik startaplarning Kremniy vodiysi, Yevropa, Yaqin Sharq va Osiyodagi investorlar hamda mentorlar bilan aloqalarini rivojlantirish masalalarini muhokama qildi. Hamkorlikning potensial yo‘nalishlari sifatida sanoat, sunʼiy intellekt, barqaror rivojlanish va raqamli transformatsiya qayd etildi.
Uchrashuv yakunlari bo‘yicha tomonlar sunʼiy intellekt startaplari uchun xalqaro investitsiyalar oqimini kengaytirish, O‘zbekistonga Osiyo LP-investorlari kapitalini jalb qilish va mahalliy venchur ekotizimining global investorlar tarmog‘i bilan aloqalarini mustahkamlash bo‘yicha ishlarni davom ettirishga kelishib oldi.
