Toshkent, O’zbekiston (UzDaily.uz) — Xivadagi “Ichan-Kala” muzey-qo‘riqxonasi hududida hunarmandlar uchun «Olloqulixon karvon saroyi» savdo markazini tashkil etish rejalashtirilmoqda.
Loyiha 10 sentyabr kuni O‘zbekiston Prezidenti Shavkat Mirziyoyevga madaniy merosni asrab-avaylash va muzey ishini rivojlantirish bo‘yicha kelgusidagi chora-tadbirlarga bag‘ishlangan taqdimot davomida namoyish etildi.
Yangi savdo markazi savdo nuqtalarining tartibsiz joylashuvi o‘rnini egallashi kerak. Bunday tartibsiz joylashuv tarixiy obyektlarning vizual yaxlitligiga putur yetkazib, sayyohlar uchun noqulayliklar keltirib chiqarmoqda.
Loyiha savdo anʼanalarini saqlab qolish, hunarmandlar uchun sharoit yaratish, shuningdek, ko‘rgazma va yarmarkalar o‘tkazishni nazarda tutadi. Obyekt “Ichan-Kala” hududida yangi sayyohlik maskaniga aylanishi kutilmoqda.
Nomoddiy madaniy meros bilan ishlashni davom ettirish doirasida “Hunarmand” Respublika assotsiatsiyasi Madaniy meros agentligi bilan hamkorlik qiladi.
Yana bir qaror sifatida Prezident huzurida madaniy boyliklarni repatriatsiya qilish bo‘yicha komissiya tuzish taklif etildi. Komissiya turli tarixiy davrlarda mamlakat hududidan olib chiqib ketilgan tarixiy yodgorliklar, arxeologik artefaktlar, noyob qo‘lyozmalar va sanʼat asarlarini tizimli ravishda izlash, huquqiy himoya qilish hamda O‘zbekistonga qaytarish bilan shug‘ullanadi.
Taqdimotda Toshkent mozaika maktabini saqlab qolish masalasiga ham alohida eʼtibor qaratildi. Buning uchun anʼanaviy texnikalarni zamonaviy loyihalash, ishlab chiqarish va restavratsiya texnologiyalari bilan uyg‘unlashtiradigan ixtisoslashtirilgan markaz tashkil etish taklif qilindi. Markaz, shuningdek, mutaxassislar tayyorlash va monumental sanʼatning yangi yo‘nalishini rivojlantirish maydoniga aylanadi.
Samarqandda Bibi-Xonim majmuasini konservatsiya va restavratsiya qilish loyihasini Aga Khan Trust for Culture bilan hamkorlikda davom ettirish rejalashtirilmoqda. Ishlar arxitekturani konservatsiya qilishning xalqaro standartlarini qo‘llash, yodgorlikni ilmiy o‘rganish va tadqiq etish, arxeologik hamda muhandislik tadqiqotlarini o‘tkazish, materiallarni tahlil qilish va konstruktiv modellashtirishni nazarda tutadi.
Olingan maʼlumotlar asosida loyiha yechimlari ishlab chiqiladi. Shuningdek, mahalliy mutaxassislarni tayyorlash ko‘zda tutilgan. Keyingi bosqichlarda asosiy gumbaz va unga tutash inshootlarni konservatsiya qilish, hududni obodonlashtirish hamda muzey ekspozitsiyasini tashkil etish rejalashtirilmoqda.
Taqdimotda 2027–2035 yillarga mo‘ljallangan Madaniy merosni rivojlantirish strategiyasi bo‘yicha takliflar ham ko‘rib chiqildi. Hujjat raqamlashtirish, moddiy va nomoddiy merosni saqlash, madaniy boyliklarni repatriatsiya qilish, tabiiy merosni muhofaza qilish hamda restavratsiyani rivojlantirish masalalarini qamrab oladi.
Shavkat Mirziyoyev taqdim etilgan takliflarni takomillashtirish va ularning amaliy ijrosini taʼminlash bo‘yicha topshiriq berdi.
:
