Toshkent, O’zbekiston (UzDaily.uz) — Xalqaro texnologik tadbirlar tarmog‘i Global Tech Weekend (GTW) 2027 yil uchun dasturini eʼlon qildi.
Mavsum aprel oyida Bokuda boshlanadi, may oyida esa tadbirlar Toshkentda o‘tkaziladi. Bu haqda Markaziy Osiyo, Kavkaz va AQSHdagi tarmoq rivojlanishini muvofiqlashtiruvchi GTW US Amerika tashkiloti maʼlum qildi.
Dastlabki taqvimdan, shuningdek, 2027 yil iyun oyida Tbilisi, oktyabr oyida Ostona va dekabr oyida Los-Anjeles shaharlarida tadbirlar o‘tkazish rejalari o‘rin olgan. Har bir shahardagi tadbirlarning aniq sanasi keyinroq eʼlon qilinadi.
Boku ilk bor Global Tech Weekend tadbiriga mezbonlik qiladi
2027 yil aprel oyida Bokuda Global Tech Weekend‘ning Ozarbayjondagi ilk tadbiri bo‘lib o‘tadi. Tadbirni tayyorlash va o‘tkazish mahalliy hamkorlar zimmasiga yuklanadi. GTW US esa dasturni shakllantirish va maʼruzachilarni tanlash jarayonini muvofiqlashtiradi.
Toshkent tarmoqning muhim tadbirlar maydoni maqomini saqlab qoladi
Toshkentda navbatdagi Global Tech Weekend tadbirini 2027 yil may oyida o‘tkazish rejalashtirilgan. Avvalgi tadbir O‘zbekiston poytaxtida 2026 yil 15–17 may kunlari bo‘lib o‘tgan va unda qariyb 3 ming kishi ishtirok etgan.
Tadbirning asosiy texnologik hamkori IT Park Uzbekistan bo‘lgan. Ushbu tashkilot 2027 yilda ham Toshkentdagi tadbirni qo‘llab-quvvatlaydi.
Global Tech Weekend dasturi sunʼiy intellekt, o‘yin industriyasi, kino va kreativ texnologiyalarni qamrab oladi. Shuningdek, kompaniyalar va institutsional hamkorlar uchun maxsus tadbirlar ham tashkil etiladi.
Tarmoqning avvalgi tadbirlari qatoriga GTW Tbilisi 2025, GTW San Francisco 2026, GTW Tashkent 2026 va GTW Tbilisi 2026 kiradi. Ushbu tadbirlarda jami 30 mingdan ortiq kishi ishtirok etgan.
2026 yilda San-Fransiskoda o‘tkazilgan uchrashuv tarmoq tarixida Markaziy Osiyo va Kavkazdan kelgan delegatsiya AQSHdagi tadbirda ishtirok etgan birinchi holat bo‘ldi.
«Boku va Toshkent 2027 yilgi mavsumimizni ochib beradi. Har ikki shaharda texnologik hamjamiyatlar jadal rivojlanmoqda. Biz startap asoschilari, kompaniyalar va muassasalar ushbu shaharlarda mintaqa mamlakatlari hamda AQSHdan bo‘lgan hamkorlarni topishlari uchun imkoniyat yaratishni istaymiz», — dedi GTW US asoschisi va bosh direktori Nodo Ivanidze.
Alohida shaharlardagi tadbirlarga homiylik qilishdan manfaatdor kompaniyalar, shuningdek, Global Tech Weekend bilan hamkorlik qilish imkoniyatlarini ko‘rib chiqayotgan muassasalar tashkilotchilar bilan rasmiy veb-sayt orqali bog‘lanishlari mumkin.
GTW US Markaziy Osiyo, Kavkaz va AQSHda o‘tkaziladigan texnologik tadbirlar orqali kompaniya asoschilari, investorlar, biznes va turli muassasalarni birlashtiruvchi Global Tech Weekend tarmog‘ini rivojlantiradi.
Tashkilot tadbirlar dasturini shakllantiradi va maʼruzachilarni taklif qiladi. Bunda o‘z shaharlaridagi tadbirlarni tashkil etish uchun masʼul bo‘lgan mahalliy hamkorlar bilan hamkorlik qiladi.
