«Andijon polkasi» Ginnes rekordlar kitobiga kiritilishi uchun 730 mln so‘m ajratildi

Toshkent, O’zbekiston (UzDaily.uz) — Andijon viloyati hokimi «Andijon polkasi» raqsini rekord sifatida qayd etish va Ginnes rekordlar kitobiga kiritish bilan bog‘liq tadbirlarni moliyalashtirish uchun viloyat byudjeti zaxira jamg‘armasidan 730 mln so‘m ajratish to‘g‘risida farmoyish berdi.

Mahalliy hokimlik maʼlum qilishicha, qaror viloyat hokimligi kotibiyati rahbarining xizmat yozuvi hamda viloyat madaniyat boshqarmasining murojaati asosida qabul qilingan.

Ajratilgan mablag‘lar rekord o‘rnatish loyihasini amalga oshirish va uni xalqaro darajada rasmiylashtirish bilan bog‘liq xarajatlarni qoplash uchun mo‘ljallangan.

Iyun oyi oxirida Andijonda keng ko‘lamli madaniy tadbir bo‘lib o‘tdi. Unda minglab ishtirokchilar bir vaqtning o‘zida «Andijon polkasi»ni ijro etdi. Aksiya yakunlariga ko‘ra, raqs rasman Ginnes rekordlar kitobiga kiritildi.

Tadbirda, shuningdek, fojiali hodisa ham yuz berdi.

Aksiya o‘tkazilgan kuni ommaviy raqs ijrosida ishtirok etishi kerak bo‘lgan 15 yoshli maktab o‘quvchisi yo‘l-transport hodisasi oqibatida halok bo‘ldi.

O‘quvchilarni tadbir o‘tkaziladigan joyga olib ketayotgan avtomobil yo‘lda avariyaga uchragan.