“Uzbekistan Airports” АҚШдаги инвестиция лойиҳаларини тақдим этди

Тошкент, Ўзбекистон (UzDaily.uz) — "Uzbekistan Airports" компанияси 13 апрель куни Бостон ва 14 апрель куни Нью-Йорк шаҳарларида бўлиб ўтган “Uzbekistan Investor Day” халқаро тадбирида иштирок этди.

Форум халқаро молия институтлари, йирик инвестиция компаниялари ва стратегик ҳамкорларни бирлаштирди. Тадбирдан кўзланган асосий мақсад Ўзбекистоннинг инвестициявий салоҳияти ҳамда амалга оширилаётган иқтисодий ислоҳотлар билан таништиришдан иборат бўлди.

Тадбир доирасида "Uzbekistan Airports" делегацияси Citigroup, JPMorgan Chase, Artisan Partners, Xtellus Capital Partners ва Nomura Capital Partners каби етакчи хорижий банклар ҳамда инвестиция ташкилотлари билан қатор учрашувлар ўтказди. Ҳамкорларга компаниянинг сўнгги йиллардаги трансформацияси натижалари, асосий молиявий кўрсаткичлари, корпоратив бошқарув тамойиллари ва аэропорт инфратузилмасини ривожлантириш режалари тақдим этилди.

Халқаро инвесторлар Ўзбекистон авиация соҳасига ҳамда компания билан ҳамкорлик истиқболларига катта қизиқиш билдирдилар. Томонлар ўзаро алоқаларнинг устувор йўналишлари ва шерикликнинг эҳтимолий форматларини муҳокама қилдилар.

Тадбирнинг энг муҳим натижаларидан бири — JPMorgan Chase билан ҳамкорлик меморандумининг имзоланиши бўлди. Мазкур ҳужжат капитал бозорларида ҳамкорликни ривожлантириш, жумладан, еврооблигациялар чиқариш ва бошқа молиявий воситалардан фойдаланишни кўзда тутади.

“УUzbekistan Investor Day”да иштирок этиш компаниянинг халқаро молия бозорларидаги мавқеини мустаҳкамлаш ҳамда мамлакат инфратузилма лойиҳаларига инвестицияларни жалб қилиш имкониятларини кенгайтириш йўлидаги муҳим қадам бўлди.