Сенат Олий суд раиси Бахтиёр Исломовни лавозимидан озод қилди

Тошкент, Ўзбекистон (UzDaily.uz) — 18 июнь куни Тошкент шаҳрида Олий Мажлис Сенати раиси Танзила Нарбаева раислигида Сенат Кенгашининг йиғилиши бўлиб ўтди. Унда Ўзбекистон Республикаси Олий суди таркибига ўзгартиришлар киритиш масаласи кўриб чиқилди.

Йиғилиш якунларига кўра, Сенат Ўзбекистон Республикаси Олий суди раиси Бахтиёр Жаҳонгирович Исломовни лавозимидан озод этиш тўғрисида қарор қабул қилди.

Аввалроқ уни лавозимидан озод этиш ҳақидаги тақдимнома президент Шавкат Мирзиёев томонидан Олий Мажлис Сенатига киритилган эди. Амалдаги тартибга мувофиқ, Олий суд раиси давлат раҳбарининг тақдимномасига кўра Сенат томонидан беш йил муддатга тайинланади.

Исломов 2022 йил август ойидан буён Олий суд раиси лавозимида ишлаб келаётган эди. Унинг ваколат муддати 2027 йилда тугаши керак эди, аммо қонунчиликка мувофиқ, президент тақдимномаси асосида Сенат қарори билан ваколатларни муддатидан олдин тугатиш имконияти назарда тутилган.