«Ростех» «Иннопром»да 50 дан ортиқ ишланмани тақдим этади

Тошкент, Ўзбекистон (UzDaily.uz) — «Ростех» давлат корпорацияси 20–22 апрель кунлари Тошкент шаҳрида бўлиб ўтадиган «Иннопром. Марказий Осиё» халқаро кўргазмасида саноатнинг турли тармоқларига оид 50 дан ортиқ ишланмани намойиш этади. Бу ҳақда корпорациянинг расмий баёнотида айтилган.

Экспозицияга авиация, двигателсозлик, тиббиёт, энергетика соҳаларидаги ечимлар, шунингдек газни ташиш учун мўлжалланган ускуналар киритилади. «Ростех»да таъкидланишича, тақдим этиладиган ишланмалар хорижий буюртмачилар қизиқишига мўлжалланган.

Халқаро майдонда илк бор саноат, тижорат ва турар жой объектларини электр энергияси билан таъминлашга мўлжалланган АПН-30 мобил қурилмаси намойиш этилади.

Газ транспорти соҳаси учун УГПА-16(25) агрегати, шунингдек Бирлашган двигателсозлик корпорацияси томонидан ишлаб чиқилган АЛ-31СТ ва НК-14СТ двигателлари тақдим этилади.

Бундан ташқари, корпорация «Юқори аниқликдаги комплекслар» холдингига тегишли махсус техника намуналарини ҳам кўрсатади. Улар қаторига «АНТ» мини-юклагичи, «АНТ-1000-ПМ» роботлаштирилган ёнғин ўчириш мажмуаси ва МГР-4 «Шмель» гуманитар минасизлантириш машинаси киради.