RMC Sport: Танташев ЖЧда бошқа ўйинларга тайинланмайди

Тошкент, Ўзбекистон (UzDaily.uz) — ФИФА ҳаками Илгиз Танташев 2026 йилги футбол бўйича жаҳон чемпионатининг қолган учрашувларига тайинланмайди. Шу билан бирга, ҳакамга нисбатан расмий интизомий чоралар қўлланилмайди. Бу ҳақда Франциянинг RMC Sport нашри хабар берди.

Нашр маълумотига кўра, бундай қарор Парагвай ва Франция терма жамоалари ўртасидаги 1/8 финал учрашувидан кейин қабул қилинган. Мазкур баҳсдаги ҳакамлик кенг муҳокамаларга сабаб бўлган ва қатор хорижий оммавий ахборот воситалари Танташевнинг ишини танқид қилган.

RMC Sport таъкидлашича, ФИФА ўзбекистонлик ҳакамга нисбатан расмий интизомий санкциялар қўлламасликка қарор қилган. Бироқ у жаҳон чемпионатининг қолган ўйинларига тайинланмайди. Бу эса амалда унинг турнирдаги фаолияти якунланганини англатади.

Шу билан бирга, ФИФА ҳозирча мазкур масала юзасидан расмий баёнот билан чиқмаган. Танташевнинг кейинги учрашувларга тайинланмаслиги ҳақидаги маълумот ҳозирча фақат RMC Sport нашри эълон қилган ахборотга асосланади.