Қуёш панеллари 145 мингдан ортиқ объектга ўрнатилди

Тошкент, Ўзбекистон (UzDaily.uz) — Ўзбекистонда 145 мингдан ортиқ объектда қуёш панеллари ўрнатилган бўлиб, уларнинг умумий қуввати 2 114 МВтга етди. Бу ҳақда Энергетика вазирлиги хабар қилди.

Улар орасида 21 643 та ижтимоий соҳа объекти мавжуд бўлиб, уларда 425 МВт қувват ўрнатилган, 33 208 та тадбиркорлик субъектида бу кўрсаткич 1 155 МВтни ташкил этади, шунингдек, 88 489 та хонадонга тўғри келадиган қувват 503 МВтни ташкил қилмоқда. Бундан ташқари, 2 398 та кўп қаватли уйларда умумий қуввати 31 МВт бўлган қуёш қурилмалари жойлаштирилган.

2026 йилнинг биринчи чорагида кичик қуёш панеллари 411 млн кВт⋅соат электр энергияси ишлаб чиқарди. Таqqослаш учун, 2025 йилнинг шу даврида бу кўрсаткич 252 млн кВт⋅соатни ташкил этган. Шу тариқа, ўсиш 159 млн кВт⋅соат ёки 63 фоизни ташкил этди.

Ишлаб чиқариш ҳажмининг ошиши анъанавий энергия ресурслари истеъмолини камайтириш имконини берди. Жумладан, табиий газ тежами 125 млн куб метрга етди, атмосферага чиқарилиши олди олинган зарарли моддалар ҳажми эса 134 минг тоннани ташкил қилди.

Ишлаб чиқарилган электр энергияси ҳажми тахминан 685 минг хонадоннинг ўртача уч ойлик истеъмолига тенг.

Шунингдек, аҳоли ва тадбиркорлар томонидан ўз эҳтиёжларидан ортиқча ҳолда умумий тармоққа узатилаётган электр энергияси ҳажми ҳам ошгани қайд этилмоқда. 2026 йил январь–март ойларида бу кўрсаткич 163,7 млн кВт⋅соатга етган бўлиб, бу 3,5 баробарга ошган.