Ўзбекистонга ярим йилда 6,5 млндан зиёд турист келди

Тошкент, Ўзбекистон (UzDaily.uz) — 2026 йилнинг январь–июнь ойларида Ўзбекистонга туристик мақсадларда 6 миллион 565 минг 410 нафар хорижий фуқаро ташриф буюрди. Бу ҳақда Миллий статистика қўмитаси хабар қилди.

Ўтган йилнинг шу даврига нисбатан хорижий туристлар сони 1,3 миллион нафарга ёки 24,9 фоизга ошган.

Энг катта туристик оқим анъанавий равишда қўшни давлатлар ҳиссасига тўғри келди. Ташриф буюрувчилар сони бўйича Қирғизистон етакчилик қилди. Ушбу мамлакатдан Ўзбекистонга 1 миллион 875 минг 332 нафар келган. Иккинчи ўринда 1 миллион 553 минг 688 нафар турист билан Қозоғистон, учинчи ўринда эса 1 миллион 471 минг 670 сафарни амалга оширган Тожикистон фуқаролари қайд этилди.

Энг кўп турист юборган давлатлар биринчи бешталигига Россия ҳам кирди. У ердан 585 минг 558 нафар турист ташриф буюрган. Бешинчи ўринни эса 238 минг 925 нафар ташрифчи билан Афғонистон эгаллади.

Бошқа давлатлар орасида туристлар оқими бўйича биринчи ўнталикка Хитой — 223 минг 479 нафар, Туркманистон — 164 минг 211 нафар, Туркия — 95 минг 466 нафар, Ҳиндистон — 26 минг 450 нафар ва Германия — 22 минг 294 нафар турист билан кирди.

Хорижий меҳмонлар сонининг ўсиши Ўзбекистон туризм соҳасининг тикланиши ва ривожланиши давом этаётганини, шунингдек, мамлакатнинг минтақа ва бошқа давлатлардан келувчи сайёҳлар учун жозибадорлиги ортиб бораётганини кўрсатади.