Ўзбекистон ва Хитой тиббиёт соҳасида ҳамкорликни кенгайтиради

Тошкент, Ўзбекистон (UzDaily.uz) — Тиббий ва фармацевтика саноатини ривожлантириш агентлиги директори Абдулла Азизов Хитойнинг Guangzhou Concord Center компанияси вакиллари билан учрашув ўтказди. Учрашув якунлари бўйича томонлар ўзаро ҳамкорлик тўғрисида меморандум имзолади. Бу ҳақда Тиббий ва фармацевтика саноатини ривожлантириш агентлиги хабар берди.

Учрашув иштирокчилари Ўзбекистон ва Хитой ўртасида тиббиёт соҳасидаги ҳамкорликни янада кенгайтириш, замонавий технологияларни жорий этиш, тажриба алмашиш ва қўшма лойиҳаларни амалга ошириш масалаларини муҳокама қилди.

Тиббий хизматлар сифатини ошириш, шунингдек, тиббиёт амалиётида замонавий диагностика ва даволаш усулларини қўллашга алоҳида эътибор қаратилди.

Томонлар, шунингдек, соҳани ривожлантириш учун илғор технологияларни жалб қилиш имкониятларини кўриб чиқди.

Имзоланган меморандум кейинги амалий ҳамкорлик ва қўшма ташаббусларни амалга ошириш учун асос яратади.

Ҳужжат, шунингдек, Ўзбекистон ва Хитой ўртасида тиббиёт соҳасида ҳамкорликнинг янги йўналишларини ривожлантиришга хизмат қилиши кўзда тутилган.