Ўзбекистон ва ЖССТ соғлиқни сақлаш ислоҳотларини муҳокама қилди
Тошкент, Ўзбекистон (UzDaily.uz) — Ўзбекистон Соғлиқни сақлаш вазири Элдор Адилов Жаҳон соғлиқни сақлаш ташкилоти Европа минтақавий бюроси директори Ханс Клюге билан видеоконференция ўтказди. Томонлар мамлакат соғлиқни сақлаш тизимини узоқ муддатли ривожлантириш истиқболларини муҳокама қилди. Бу ҳақда Ўзбекистон Соғлиқни сақлаш вазирлиги матбуот хизмати хабар берди.
Учрашувда вазир ЖССТга соғлиқни сақлаш соҳасидаги ислоҳотларни қўллаб-қувватлаётгани учун миннатдорлик билдирди. Хусусан, ташкилот кўмагида Ўзбекистонда она ва бола саломатлигини муҳофаза қилиш, бирламчи тиббий-санитария ёрдамини такомиллаштириш ҳамда миллий тиббий суғурта тизимини жорий этиш бўйича ташаббуслар амалга оширилмоқда.
«Соғлиқни сақлаш — 2035» стратегияси лойиҳасини тайёрлашга алоҳида эътибор қаратилди. Элдор Адилов ҳужжатни ишлаб чиқишда халқаро тажриба ва ЖССТ экспертларининг кўмаги муҳимлигини таъкидлаб, тегишли мутахассисларни жалб қилиш бўйича ҳамкорликни кучайтиришни таклиф қилди.
Томонлар, шунингдек, ЖССТ Европа минтақавий қўмитасининг 77-сессиясини Ўзбекистонда ўтказишга тайёргарлик масалаларини кўриб чиқди.
Бундан ташқари, иштирокчилар DRG тизимини ишлаб чиқиш ва жорий этишга тайёргарликни муҳокама қилди. Давлат тиббий суғуртаси жамғармаси ва ЖССТнинг Ўзбекистондаги ваколатхонаси ўртасидаги донорлик келишуви доирасидаги ишларга ҳам алоҳида эътибор қаратилди.
Соғлиқни сақлаш вазирлиги маълумотларига кўра, мазкур лойиҳани амалга ошириш тиббий хизматларни молиялаштириш ва улар учун ҳақ тўлаш механизмларини такомиллаштириш, шунингдек, тизим самарадорлиги ва шаффофлигини оширишга қаратилган.
Учрашувда 2026–2030 йилларга мўлжалланган Марказий Осиёда саломатлик ва фаровонлик масалалари бўйича «Йўл харитаси 2.0» доирасидаги ҳамкорлик истиқболлари ҳам муҳокама қилинди. Томонлар унда назарда тутилган вазифаларни Ўзбекистон соғлиқни сақлаш тизимидаги ислоҳотлар билан мувофиқлаштириш имкониятларини кўриб чиқди.
Музокаралар якунида томонлар ҳамкорликни кенгайтириш, қўшма лойиҳа ва ташаббусларни амалга оширишни давом эттиришга тайёр эканини тасдиқлади.
