Тошкент, Ўзбекистон (UzDaily.uz) — Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси ўринбосари Улуғбек Давлатов бошчилигидаги делегация Европа Иттифоқининг рақобат тўғрисидаги қонунчилиги ва уни қўллаш амалиётига бағишланган халқаро семинарда иштирок этди.
Тадбир 2026 йил 12–13 октябрь кунлари Брюссель шаҳрида Европа Комиссиясининг Рақобат масалалари бўйича Бош дирекцияси (DG COMP) ташаббуси билан ўтказилди.
Иштирокчилар давлат ёрдамининг рақобатга таъсирини баҳолаш, монополияга қарши текширувлар ўтказиш ва иқтисодий концентрацияни назорат қилиш бўйича Европа ёндашувларини кўриб чиқдилар.
Семинар дастуридан битимларни кўриб чиқиш жараёнида улар иштирокчиларига муайян мажбуриятларни юклаш масалалари ҳам ўрин олди. Шунингдек, миллий рақобат органлари ўртасидаги ҳамкорлик ва ҳуқуқни қўллаш амалиёти бўйича тажриба алмашишга алоҳида эътибор қаратилди.
Экспертлар муҳокамасининг асосий мавзуларидан бири трансчегаравий савдо ва асл маҳсулотлар импортига қўйиладиган чекловлар бўлди.
Иштирокчилар товар белгиларига бўлган ҳуқуқлар билан рақобат тўғрисидаги қонунчилик талаблари ўртасидаги муносабатни, шунингдек, импорт чекловларининг мустақил импортчиларнинг бозорга кириши, нархларни белгилаш ва истеъмолчилар танловига эҳтимолий таъсирини муҳокама қилдилар.
Ушбу масалалар 30 сентябрь куни DG COMP экспертлари билан ўтказилган дастлабки онлайн маслаҳатлашувларнинг давоми бўлди. Мазкур маслаҳатлашувлар Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси кўриб чиқаётган иш юзасидан ўтказилган эди.
Ташриф доирасида Ўзбекистон делегацияси вакиллари DG COMP сиёсат ва стратегия масалалари бўйича дирекцияси директори Мария Ясперс билан ҳам учрашдилар.
Томонлар институционал ҳамкорликни кенгайтириш, трансчегаравий масалалар бўйича маслаҳатлашувлар ўтказиш, рақобат сиёсати ва давлат ёрдами соҳасида тажриба алмашиш имкониятларини муҳокама қилдилар.
Бундан ташқари, биргаликда ўқув тадбирларини ташкил этиш истиқболлари ва ўзаро англашув меморандумини тузиш имконияти кўриб чиқилди.
Қўмита Европа экспертларидан олинган материаллар ва тавсияларни миллий қонунчиликни ҳисобга олган ҳолда ўрганиб чиқишни режалаштирмоқда.
Ушбу иш натижаларидан Ўзбекистонда рақобат тўғрисидаги қонунчиликни қўллаш амалиётини такомиллаштириш бўйича таклифлар тайёрлашда фойдаланиш кўзда тутилган.
