Тошкент, Ўзбекистон (UzDaily.uz) — «Ўзбекнефтгаз» ҳозирча эски конларда газ қазиб олиш ҳажмининг пасайишини геологик қидирув ишларидан кейин ишга туширилаётган янги қудуқлар ва объектлар ҳисобига қоплай олмаяпти.
Компания қудуқларни таъмирлаш, уларда ён стволларни бурғилаш ва компрессор станцияларини ишга тушириш орқали 2026 йил охиригача газ қазиб олишни барқарорлаштиришни режалаштирмоқда. Бу ҳақда 27 октябрь куни компания бош геологи Нодир Муҳиддинов матбуот анжуманида маълум қилди.
2026 йилнинг январь–сентябрь ойларида «Ўзбекнефтгаз» ва унинг таркибидаги корхоналар қарийб 17 миллиард куб метр газ қазиб олди. Компания йил охиригача бу кўрсаткични 22,8 миллиард куб метрга етказишни мақсад қилган. Таққослаш учун, 2025 йилда газ қазиб олиш ҳажми 25,2 миллиард куб метрни ташкил этган. Агар жорий йил учун белгиланган режа бажарилса, йиллик газ қазиб олиш ҳажми тахминан 9,5 фоизга қисқаради.
Муҳиддинов ишлаб чиқариш ҳажми пасайишининг асосий сабабларидан бири сифатида йирик конлардаги захираларнинг юқори даражада ўзлаштириб бўлинганини кўрсатди.
Ушбу конларда захираларнинг 80 фоиздан ортиғи қазиб олинган бўлиб, бу газ қазиб олиш ҳажмининг янада пасайишига олиб келмоқда. Айни пайтда геологик қидирув ишлари ва янги қудуқларни ўзлаштириш ҳисобига олинаётган қўшимча газ ҳажми амалдаги конлардаги йўқотишларни ҳозирча қоплай олмаяпти.
Йил бошида суткалик газ қазиб олиш ҳажми 65 миллион куб метрни ташкил этган. Шундан бери базавий қазиб олиш кўрсаткичи суткасига 12,6 миллион куб метрга камайди. Компания ҳозиргача ушбу пасайишнинг қарийб 5 миллион куб метрлик қисмини қоплай олмаган.
Қазиб олиш ҳажми пасайишини секинлаштириш мақсадида «Ўзбекнефтгаз» йил бошидан буён 79 та қудуқда мустақил равишда капитал ва жорий таъмирлаш ишларини амалга оширди.
Компания йил охиригача суткалик газ қазиб олиш ҳажмини 2026 йил бошидаги даражага қайтаришни режалаштирмоқда. Бунинг учун қудуқларни таъмирлашни давом эттириш ва геологик қидирув ишлари давомида аниқланган объектларни ишга туширишдан ташқари, қудуқ оғзидаги компрессор станцияларини ишга тушириш ҳам кўзда тутилган.
Ишнинг яна бир йўналиши мураккаб капитал таъмирлаш ишларини амалга ошириш, жумладан, аввал фойдаланишдан чиқарилган қудуқларда ён стволларни бурғилашдан иборат бўлади. Ушбу чора-тадбирлар захиралари тугаб бораётган конларда газ қазиб олиш ҳажмининг пасайишини қоплашга ёрдам бериши керак.
