Ўзбекистон ва Sojitz янги инвестиция лойиҳаларини муҳокама қилишди

Тошкент, Ўзбекистон (UzDaily.uz) — 2026 йил 18 июнь куни Ўзбекистон Республикаси ташқи ишлар вазири Бахтиёр Саидов Тошкент халқаро инвестиция форумида иштирок этиш учун мамлакатимизга ташриф буюрган Япониянинг “Sojitz Corporation” компанияси президенти ва бош ижрочи директори Косуке Уэмура билан учрашув ўтказди.

Мулоқот давомида компаниянинг Ўзбекистонда амалга ошираётган инвестиция лойиҳалари ҳамда янги ташаббуслари муҳокама қилинди.

Томонлар саноат, энергетика, транспорт ва инфратузилма соҳаларидаги ҳамкорликни янада кенгайтириш учун мавжуд имкониятларни кўриб чиқди.

“Sojitz Corporation”нинг мамлакатимиз иқтисодиётини модернизация қилиш ва янги ишлаб чиқариш қувватларини яратишга қаратилган лойиҳаларини қўллаб-қувватлашга тайёрлик билдирилди.