Ўзбекистон ва Беларус парламентлараро ҳамкорликни кенгайтириш масалаларини муҳокама қилишди

Тошкент, Ўзбекистон (UzDaily.uz) — Жорий йилнинг 30 июнь куни Олий Мажлис Сенатида Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Алишер Агзамходжаев Беларус Республикасининг Ўзбекистондаги Фавқулодда ва Мухтор Элчиси Александр Огородников билан учрашди.

Учрашувда Ўзбекистон ва Беларус ўртасидаги икки томонлама муносабатларни, айниқса парламентлараро ҳамкорликни янада мустаҳкамлаш, савдо-иқтисодий, инвестициявий, маданий-гуманитар ва туризм соҳаларидаги алоқаларни кенгайтириш масалалари муҳокама қилинди.

Шунингдек, парламент дипломатиясини фаоллаштириш, ўзаро ташрифлар ва қўшма тадбирларни давом эттириш, шунингдек, халқаро парламент майдонларидаги ҳамкорликни янада ривожлантириш муҳим аҳамиятга эга экани таъкидланди.

Учрашув якунида томонлар икки мамлакат ўртасидаги дўстона муносабатлар ва стратегик шерикликни мустаҳкамлаш, парламентлараро мулоқотни кенгайтириш ҳамда икки ва кўп томонлама форматлардаги амалий ҳамкорликни изчил давом эттиришга тайёрлигини билдирди.