Ўзбекистон Германия билан 20 миллион долларлик экспорт шартномаларини тузди

Тошкент, Ўзбекистон (UzDaily.uz) — Германиянинг Дюсселдорф шаҳрида ўтказилган “Wire & Tube Düsseldorf 2026” халқаро кўргазмасида «Ўзелтехсаноат» уюшмаси ҳамда тизим корхоналари фаол иштирок этди.

“Made in Uzbekistan” миллий стендида электротехника маҳсулотлари кенг намойиш қилинди.

Кўргазма доирасида Европа ва Америка компаниялари билан самарали B2B учрашувлар ўтказилди.

Жумладан, кабель маҳсулотларини етказиб бериш, Германиянинг «Starofit» компанияси билан мис қувурлар ишлаб чиқаришни маҳаллийлаштириш, шунингдек, «CzechTrade» агентлиги билан Европа Иттифоқи бозорларига чиқиш имкониятлари муҳокама қилинди.

Муҳим натижалардан бири сифатида «Metsol» МЧЖ ва Словениянинг «Zikas» компанияси, шунингдек, “Metal Processing Technology” МЧЖ ва германиялик ҳамкорлар ўртасида йирик экспорт битимлари тузилди.

Бундан ташқари, “Sharq Tubes” ҳамда “Artikul Aziya Kabel” корхоналари Германия ва Австрия компаниялари билан ҳамкорлик ҳужжатларини имзолади.

Умуман олганда, кўргазма якунларига кўра 2026 йил учун умумий қиймати 20 миллион АҚШ долларига тенг экспорт шартномаларига эришилди. Бу эса уюшма корхоналарининг халқаро бозордаги ўрнини янада мустаҳкамлашга хизмат қилади.