Новосибирскдан ўзбекистонлик аёл ва боласи ватанга қайтарилди

Тошкент, Ўзбекистон (UzDaily.uz) — Ўзбекистон дипломатик ваколатхонаси ходимлари Россия Федерациясининг Новосибирск шаҳрида оғир ҳаётий вазиятга тушиб қолган ватандош ва унинг вояга етмаган фарзандига ҳар томонлама амалий ёрдам кўрсатди.

«Дунё» ахборот агентлиги маълумотига кўра, Ўзбекистон фуқароси Россиянинг амалдаги миграция қонунчилигини бузгани учун маҳаллий ҳуқуқни муҳофаза қилувчи органлар томонидан ушланган.

Процессуал ҳаракатлар даврида аёл Чет эл фуқароларини вақтинча сақлаш марказига жойлаштирилган, унинг вояга етмаган фарзанди эса вақтинча болалар учун ихтисослаштирилган давлат муассасасига юборилган. Натижада оила бир-биридан ажралиб қолган.

Она ва болани тезкор равишда қайта бирлаштириш мақсадида Ўзбекистоннинг Новосибирск шаҳридаги Бош консуллиги ходимлари қисқа муддат ичида бола учун зарур бўлган барча консуллик ва чиқиш ҳужжатларини расмийлаштирди. Жараённи мувофиқлаштириш ва ташкилий масалаларни ҳал этишда Ўзбекистон Миграция агентлигининг маҳаллий ваколатхонаси ҳам муҳим ёрдам кўрсатди.

Дипломатлар ва тегишли идораларнинг мувофиқлаштирилган ҳаракатлари туфайли 18 июнь куни аёл ва унинг ўғли Новосибирск халқаро аэропорти — «Толмачёво»га етказилди. У ердан улар мунтазам авиақатнов орқали Тошкентга соғ-омон жўнаб кетди.

Қайд этилишича, хориждаги ўзбекистонликларнинг ҳуқуқ ва манфаатларини ҳимоя қилиш тизимли асосда амалга оширилмоқда.

Бундан аввал ҳам шунга ўхшаш ёрдам Болгария ҳудудида оғир моддий ва ижтимоий аҳволга тушиб қолган олти нафар Ўзбекистон фуқаросига кўрсатилган эди. Уларнинг ватанга қайтарилиши Ўзбекистоннинг Истанбул шаҳридаги Бош консуллиги ҳамда Миграция агентлиги кўмагида ташкил этилган.