Мисрдан Ўзбекистонга хавфли жиноятчи экстрадиция қилинди

Тошкент, Ўзбекистон (UzDaily.uz) — Миср Араб Республикасидан узоқ вақт давомида халқаро қидирувда бўлган ўта хавфли жиноятчи Ўзбекистонга экстрадиция қилинди. Бу ҳақда Ўзбекистон Республикаси Интерпол Миллий марказий бюроси хабар қилди.

Идора маълумотларига кўра, халқаро ҳамкорликни ташкил этишда асосий мувофиқлаштирувчи вазифани Ўзбекистон Интерпол Миллий марказий бюроси бажарган. Қоҳира шаҳридаги Интерпол Миллий марказий бюроси билан ҳамкорликда тезкор ахборот алмашинуви, халқаро қидирувни мувофиқлаштириш, икки мамлакатнинг ваколатли органлари ўртасидаги ҳамкорлик, шунингдек қидирувдаги шахсни қўлга олиш ва кейинчалик экстрадиция қилиш учун зарур материалларни ўз вақтида тақдим этиш таъминланган.

Қайд этилишича, мазкур шахс Ўзбекистон ҳуқуқни муҳофаза қилувчи органлари ташаббуси билан товламачилик ҳамда яна бир қатор оғир жиноятларни содир этганлик айблови билан халқаро қидирувга берилган.

Халқаро қидирув тадбирлари давомида гумонланувчининг давлатлар ўртасидаги ҳаракатланиш йўналишлари аниқланган ва унинг Миср ҳудудида экани тасдиқланган. Интерпол каналлари орқали маълумот олингач, Мисрнинг ваколатли органлари қидирувдаги шахсни қўлга олган.

Экстрадиция тўғрисидаги сўров кўриб чиқилганидан сўнг, Миср томони гумонланувчини Ўзбекистонга топшириш тўғрисида қарор қабул қилди. Барча зарур халқаро-ҳуқуқий тартиб-таомиллар якунланганидан кейин у Ўзбекистон Интерпол Миллий марказий бюроси ходимларига топширилди ва Ўзбекистон Республикаси қонунчилигига мувофиқ жиноий жавобгарликка тортиш учун мамлакатга олиб келинди.

Ўзбекистон Республикаси Интерпол Миллий марказий бюросида таъкидланишича, ушбу экстрадиция халқаро полиция ҳамкорлиги ҳамда икки давлат ҳуқуқни муҳофаза қилувчи органлари ўртасидаги ўзаро ҳамкорлик самарадорлигининг яна бир амалий намунаси бўлди.