Жиззах вилоятида 1,9 млрд сўмлик солиқ кешбэки талон-торож қилингани аниқланди

Тошкент, Ўзбекистон (UzDaily.uz) — Жиззах вилоятида ҳуқуқни муҳофаза қилувчи органлар Soliq Mobile иловаси орқали солиқ кешбэки сифатида тўланган 1,9 млрд сўм бюджет маблағлари талон-торож қилинганини аниқлади. Бу ҳақда Ўзбекистон Бош прокуратураси ҳузуридаги Иқтисодий жиноятларга қарши курашиш департаменти хабар қилди.

Идора маълумотига кўра, терговга қадар текширув давомида фуқаролар Р. А. ва Т. Ш. «B. R.» ҳамда «A. A.» компанияларининг масъул шахслари билан олдиндан тил бириктирган ҳолда умумий қиймати 16,6 млрд сўмлик товар етказиб бериш бўйича сохта ҳужжатларни расмийлаштиргани аниқланган. Шундан сўнг назорат-касса машиналари орқали гўёки маҳсулот сотишдан тушган пул маблағлари ўтказилган.

Қайд этилишича, ушбу схема иштирокчилари 3106 та касса чекини чоп этган. Мазкур чеклар асосида ижтимоий ҳимоя реестрига киритилган фуқароларга Soliq Mobile иловаси орқали солиқ кешбэки ҳисобланган.

Мазкур ҳолат юзасидан Ўзбекистон Жиноят кодексининг ўзлаштириш ёки растрата йўли билан талон-торож қилиш учун жавобгарликни назарда тутувчи 167-моддаси ҳамда сохта ҳужжатлар, штамплар, муҳрлар ва бланкларни тайёрлаш, қалбакилаштириш, ўтказиш ёки улардан фойдаланишга оид 228-моддаси билан жиноят иши қўзғатилган.

Бу каби қонунбузарликлар аввал ҳам қайд этилган. Аввалроқ Андижон вилоятида ҳуқуқни муҳофаза қилувчи органлар солиқ кешбэки механизми орқали 35 млрд сўм бюджет маблағлари талон-торож қилинганини маълум қилган эди. Фарғона вилоятида эса сохта касса чекларидан фойдаланиб 3,2 млрд сўмни ноқонуний ўзлаштирган жиноий гуруҳ фаолиятига чек қўйилган.

Июль ойи бошида Иқтисодиёт ва молия вазирлиги ҳузуридаги Яширин иқтисодиётни қисқартириш ва фискал таҳлил институти харид чеклари учун оммавий солиқ кешбэки амалиётидан воз кечиб, мақсадли рағбатлантириш чораларига ўтишни таклиф қилди.