Тошкент, Ўзбекистон (UzDaily.uz) — IT Park Uzbekistan ва Япониянинг 01Booster компанияси 2026 йилда ўзбек стартаплари ва IT-компанияларининг Япония бозорига чиқиши учун дастурни ишга туширишга келишиб олди. Бу ҳақда IT Park Uzbekistan хабар берди.
Келишув ICT WEEK Uzbekistan 2026 доирасида IT Park Uzbekistan стартап экотизимини ривожлантириш бўйича директори Фаррух Эркинов ва 01Booster ижрочи директори Такеру Кавашима ўртасида бўлиб ўтган учрашувда эришилди.
2013 йилда Токиода ташкил этилган 01Booster компанияси стартапларни акселерация қилиш, венчур инвестициялар, очиқ инновациялар ва корпоратив инновацион дастурларга ихтисослашган. Айни пайтда компаниялар ўзбек стартаплари ва дастурий таъминот ишлаб чиқувчиларини Япония бозорига олиб чиқиш учун market-entry дастурини биргаликда ишлаб чиқмоқда.
2026 йилда IT Park Uzbekistan ва 01Booster Япония бозорига чиқишдан манфаатдор бўлган ўзбек стартаплари ва IT-компаниялари учун қўшма Go-to-Market вебинарини ҳам ўтказди. Кейинги босқич сифатида дастурни амалий тарзда ишга тушириш режалаштирилган бўлиб, бу жорий йилнинг IV чорагига мўлжалланган.
Дастур ўзбек стартапларини Япония бозорида ишлашга тайёрлаш, маҳаллий корпорациялар ва инвесторлар билан алоқалар ўрнатиш, акселерация механизмларини жорий этиш ва халқаро миқёсда кенгайишни қўллаб-қувватлашга қаратилган.
Шунингдек, ўзбек стартапларининг маҳсулотларини Япония бозорида илгари суриш, қўшма форумлар ва Demo Day тадбирларини ўтказиш режалаштирилмоқда.
Учрашувда томонлар 01Booster венчур фондини Ўзбекистонда ташкил этиш имкониятини ҳам алоҳида муҳокама қилди. Бундай ташаббус маҳаллий стартапларнинг япон инвесторлари ва корпоратив ҳамкорларига кириш имкониятларини кенгайтириши, шунингдек, икки мамлакат стартап экотизимлари ўртасидаги алоқаларни мустаҳкамлаши мумкин.
IT Park Uzbekistan ва 01Booster акселерация, инвесторлар билан ҳамкорлик қилиш ҳамда Ўзбекистонда қўшма венчур ташаббусларини ривожлантириш соҳаларида ҳамкорликни давом эттириш ниятида.
