Дзюдочи Шаҳрам Аҳадов Циндаодаги Гран-прида кумуш медаль қўлга киритди

Тошкент, Ўзбекистон (UzDaily.uz) — Ўзбекистон миллий терма жамоаси аъзоси Шаҳрам Аҳадов Хитойнинг Циндао шаҳрида ўтаётган нуфузли Гран-при турнирларидан бирида юқори спорт натижасини қайд этди.

73 килограммгача бўлган вазн тоифасида иштирок этган ўзбекистонлик спортчи мусобақанинг барча саралаш босқичларидан муваффақиятли ўтиб, якунда кумуш медални қўлга киритди.

Финалга қадар бўлган йўлда Аҳадов Финляндия, Қозоғистон, Туркия ва Бирлашган Араб Амирликлари вакилларини ишончли тарзда мағлуб этди.

Турнирнинг олтин медали учун ҳал қилувчи баҳсда ўзбекистонлик дзюдочига Япония вакили, жаҳон чемпионатларининг уч карра совриндори Тацуки Исихара рақиблик қилди.

Татамида кечган кескин курашда Аҳадов тажрибали япон спортчисига имкониятни бой берди ва Хитойдаги Гран-при босқичини вице-чемпион сифатида якунлади.