Бельгия ва Миср ЖЧ гуруҳ босқичида дуранг ўйнади

Тошкент, Ўзбекистон (UzDaily.uz) — АҚШ, Канада ва Мексикада ўтаётган футбол бўйича жаҳон чемпионатининг гуруҳ босқичида Бельгия ва Миср терма жамоалари ўртасидаги учрашув дуранг натижа билан якунланди. Вашингтон штатидаги Сиэтл шаҳрида бўлиб ўтган баҳс 1:1 ҳисобида тугади.

Учрашувда ҳисоб 19-дақиқада Миср терма жамоаси футболчиси Эмам Ашур томонидан очилди. Иккинчи бўлимда, 66-дақиқада мисрлик футболчи Муҳаммад Ҳани тўпни ўз дарвозасига киритиб юборди ва бу Бельгия жамоасига ҳисобни тенглаштириш имконини берди.

Ҳар икки терма жамоа G гуруҳида иштирок этмоқда ва мазкур ўйиндан кейин бир очкодан жамғарди. Ушбу гуруҳда Эрон ва Янги Зеландия терма жамоалари ҳам иштирок этмоқда ва улар ўзаро учрашувни кейинроқ ўтказади.

Кейинги турда Бельгия терма жамоаси 21 июнь куни Эронга қарши майдонга тушади, Миср эса 22 июньга ўтар кечаси Янги Зеландияга қарши баҳс олиб боради.

Жаҳон чемпионати 19 июль куни якунланади ва мусобақа тарихда илк бор 48 та миллий терма жамоа иштирокида ўтказилмоқда. Улар 12 та гуруҳга бўлинган. 1/16 финалга ҳар бир гуруҳдан энг яхши икки жамоа, шунингдек учинчи ўринни эгаллаган саккизта энг яхши терма жамоа йўл олади.

Амалдаги жаҳон чемпиони мақомини Аргентина терма жамоаси сақлаб турибди.