Бахтиёр Саидов Сингапурда йирик инвесторлар билан мулоқот қилди

Тошкент, Ўзбекистон (UzDaily.uz) — Ўзбекистон Республикаси ташқи ишлар вазири Бахтиёр Саидов Сингапурга амалга оширган расмий ташрифи доирасида Сингапур Бизнес федерацияси (SBF) майдонида ташкил этилган йирик давра суҳбатида иштирок этди.

Тадбирда Сингапурнинг етакчи ишбилармон доиралари раҳбарлари ва топ-менежерлари, шунингдек, дунёнинг энг йирик трансмиллий корпорациялари ва инвестиция тузилмалари вакиллари қатнашди.

Муҳокамаларда Wilmar International, Indorama Corporation, Singapore Technologies Engineering, Meta, Franklin Templeton, StoneX, Meinhardt, Quest Ventures, Investbanq, Global Finance & Technology Network ҳамда TASCA каби халқаро компания ва ташкилотлар вакиллари иштирок этди. Бундай нуфузли таркиб хорижий капиталнинг жадал ривожланаётган Ўзбекистон бозорига бўлган юқори стратегик қизиқишини яна бир бор намоён этди.

Атрофлича ва амалий руҳда ўтган мулоқот давомида томонлар республиканинг инвестиция салоҳиятини батафсил таҳлил қилиб, юқори технологияли қўшма лойиҳаларни амалга оширишнинг истиқболли йўналишларини белгилаб олдилар.

Давра суҳбати иштирокчилари эътибор марказида замонавий иқтисодиётнинг энг истиқболли ва илм талаб қиладиган соҳалари бўлди. Жумладан, сунъий интеллект технологияларини жорий этиш, венчур инвестициялар бозорини ривожлантириш, замонавий маълумотларни қайта ишлаш марказларини қуриш, «ақлли шаҳарлар»ни лойиҳалаш, рақамли инфратузилмани модернизация қилиш ва инновацион таълим дастурларини ишга тушириш масалалари муҳокама қилинди.

Сингапур ва халқаро бизнес вакиллари Ўзбекистон Президенти раҳбарлигида изчил амалга оширилаётган кенг қамровли иқтисодий ислоҳотларга юқори баҳо бердилар.

Айниқса, инвестициялар учун қулай ва ишончли муҳит яратиш, рақамли иқтисодиётга ўтишни жадаллаштириш, саноат кооперациясини кенгайтириш ҳамда инновацияларни иқтисодиёт ва ижтимоий ҳаётнинг барча соҳаларига чуқур татбиқ этиш бўйича Тошкент томонидан олиб борилаётган тизимли ишлар алоҳида қайд этилди.

Учрашув якунида Бахтиёр Саидов Сингапур Бизнес федерацияси бош ижрочи директори Саманта Теога юқори даражадаги мулоқот майдонини ташкил этгани учун самимий миннатдорлик билдирди.