Бахтиёр Саидов Сингапурда дипломатик муносабатларнинг 30 йиллиги ва АСЕАН билан ҳамкорликни муҳокама қилди

Тошкент, Ўзбекистон (UzDaily.uz) — Ўзбекистон Республикаси ташқи ишлар вазири Бахтиёр Саидов Сингапурда Сингапур Республикаси ташқи ишлар вазири Вивиан Балакришнан билан самимий ва мазмунли музокаралар ўтказди.

Ўзбекистон ташқи сиёсат идораси раҳбари мамлакат делегациясига кўрсатилган самимий қабул ва меҳмондўстлик учун Сингапур томонига чуқур миннатдорлик билдирди.

Учрашув давомида дипломатлар Тошкент ва Сингапур ўртасидаги икки томонлама муносабатлар изчил ва ишончли тарзда мустаҳкамланиб бораётганини мамнуният билан қайд этдилар. Давлатлар ўртасидаги ҳамкорлик ўзаро ҳурмат, ишонч ва стратегик манфаатлар муштараклигига асосланган мустаҳкам пойдевор устида ривожланмоқда.

Музокараларнинг муҳим қисми савдо-иқтисодий ва инвестициявий ҳамкорлик маса.лаларига бағишланди. Томонлар кооперацияни кенгайтириш, икки мамлакат ишбилармон доиралари ўртасида тўғридан-тўғри алоқаларни рағбатлантириш, шунингдек, Ўзбекистон бозорида қўшма юқори технологияли лойиҳалар сонини босқичма-босқич кўпайтириш истиқболларини батафсил муҳокама қилдилар.

Ташқи ишлар вазирлари юқори даражадаги мулоқотнинг жадал суръатини сақлаб қолиш ва уни мазмунан бойитиш масаласига алоҳида эътибор қаратдилар. Шу нуқтаи назардан дипломатлар турли даражадаги бўлажак ташрифлар жадвалини кўриб чиқиб, 2027 йилда нишонланадиган Ўзбекистон ва Сингапур ўртасида дипломатик муносабатлар ўрнатилганининг 30 йиллиги муносабати билан ўтказиладиган тадбирлар дастурини шакллантириш ишларини бошладилар.

Шунингдек, Бахтиёр Саидов ва Вивиан Балакришнан минтақавий ҳамда халқаро кун тартибидаги долзарб масалалар юзасидан фикр алмашдилар. Ўзбекистон ташқи ишлар вазири Тошкентнинг Марказий ва Жануби-Шарқий Осиё ўртасидаги кўп қиррали мулоқотни кенгайтириш, АСЕАН билан амалий ҳамкорликни фаоллаштириш ҳамда кўп томонлама дипломатия институтлари доирасида шериклик алоқаларини янада чуқурлаштиришдан манфаатдор эканини таъкидлади.