Хитойнинг Xinjiang Weijie компанияси Фарғонада технологик парк лойиҳасини таклиф қилди

Тошкент, Ўзбекистон (UzDaily.uz) — Фарғона вилояти ҳокими Хайрулло Бозоров Хитойнинг “Xinjiang Weijie Investment Holding Group” компанияси раҳбари Мао Ци бошчилигидаги делегацияни қабул қилди

Учрашувда хитойлик инвесторлар томонидан вилоятимизда амалга оширилиши режалаштирилаётган инвестиция лойиҳалари муҳокама қилинди.

Вилоят ҳокими Ўзбекистон ва Хитой ўртасида барча соҳаларда муносабатлар жадал ривожланиб бораётгани, Фарғонада ҳам хитойлик бизнес вакиллари билан самарали ҳамкорлик олиб борилаётганлигини қайд этди.

Компания раҳбари Мао Ци Фарғона вилоятига инвестиция киритишга катта қизиқиш билдириб, халқаро стандартлар асосида замонавий технопарк ташкил этиш бўйича ўз таклифларини билдирди. Ушбу лойиҳа доирасида саноат, қишлоқ хўжалиги, савдо каби йўналишларда юқори технологияли ишлаб чиқаришларни йўлга қўйиш,  экспорт салоҳиятини ошириш кўзда тутилгани таъкидлади.

Вилоят ҳокими лойиҳаларни янада такомиллаштириш, аниқ таклифларни ишлаб чиқиш зарурлигини билдирди.

Якунда инвестиция лойиҳаларини биргаликда амалга ошириш бўйича ҳамкорликни давом эттиришга келишиб олинди.