Uzbekistan Airports қарийб 4 миллион йўловчига хизмат кўрсатди

Тошкент, Ўзбекистон (UzDaily.uz) — "Uzbekistan Airports" компанияси 2026 йилнинг биринчи чораги бўйича иш якунларини сарҳисоб қилди. Асосий кўрсаткичлар — йўловчи оқими, рейслар сони ва юк ташувлари бўйича барқарор ижобий динамика сақланиб қолмоқда.

2026 йилнинг январь-март ойларида Ўзбекистон аэропортлари 30 859 та авиарейсга хизмат кўрсатди, бу ўтган йилнинг мос даврига нисбатан 10% га кўпдир. Йўналишлар кесимида 22 885 та рейс халқаро, 7 974 таси эса ички йўналишларга тўғри келди.

Йилнинг дастлабки уч ойида 3 987 313 нафар йўловчига хизмат кўрсатилди, шундан 3 323 759 нафар йўловчи халқаро йўналишларда, 663 554 нафар йўловчи эса ички йўналишларда учган.

2025 йилнинг 1-чорагига нисбатан йўловчи оқими бўйича ўсиш 19% ни ташкил этди.

Тошкент анъанага кўра мамлакатнинг энг йирик аэропорти бўлиб қолмоқда: пойтахт аэропорти 2,56 млн йўловчига ва қарийб 19 мингта рейсга хизмат кўрсатиб, умумий йўловчи оқимининг асосий улушини таъминлади.

Ҳудудий аэропортлар орасида энг юқори кўрсаткичларни қуйидагилар қайд этди: Самарқанд — 376,4 минг йўловчи, Урганч — 222 минг йўловчи, Наманган — 210,1 минг йўловчи, Фарғона — 161,2 минг йўловчи.

Юк ташиш сегментида ҳам ижобий динамика сақланиб қолмоқда. Биринчи чоракда мамлакат аэропортлари орқали 19 783 тонна юк ва почта ўтказилди, бу ҳам ўтган йилнинг мос даврига нисбатан 14% га кўпдир.

2026 йилнинг биринчи чораги якунлари Ўзбекистон авиация тармоғининг барқарор ўсишини, халқаро йўналишлар тармоғи кенгайишини ва мамлакат ичидаги мобилликнинг босқичма-босқич ортишини тасдиқлайди.