Сирдарё Хитой компанияси билан янги инвестицияларни муҳокама қилмоқда

Тошкент, Ўзбекистон (UzDaily.uz) — Сирдарё вилояти ҳокимлигида вилоят ҳокими Эркинжон Турдимов Хитойнинг China Science Assistance Technology Group Co., Ltd. компанияси президентини қабул қилди.

Учрашув амалий ҳамкорликка йўналтирилган конструктив мулоқот руҳида ўтди.

Суҳбат давомида томонлар Сирдарё вилоятида ишлаб чиқариш, инновациялар ва хизматлар соҳаларини қамраб олган янги лойиҳаларни амалга ошириш истиқболларини муҳокама қилишди. Айниқса, аниқ ҳудудлар, мавжуд имкониятлар ҳамда қисқа муддатда амалга ошириш мумкин бўлган ташаббусларга алоҳида эътибор қаратилди.

Эркинжон Турдимов хорижий инвесторлар учун яратилган қулай шароитлар, ривожланган инфратузилма ва самарали қўллаб-қувватлаш механизмлари ҳақида батафсил маълумот берди. Шунингдек, тайёр ҳолатга келган лойиҳаларни ҳар томонлама қўллаб-қувватлаш тамойилига қатъий амал қилиниши таъкидланди.

Музокаралар якунида томонлар ҳамкорликни амалий босқичга тезкор ўтказиш ва белгиланган лойиҳаларни босқичма-босқич ишга тушириш бўйича келишувга эришишди.