Самарқандда прокурор ўринбосари пора билан ушланди

Тошкент, Ўзбекистон (UzDaily.uz) — Самарқанд вилоятида Давлат хавфсизлик хизмати ходимлари прокуратура органлари билан ҳамкорликда Ургут тумани прокурори ўринбосарини пора олиш ва мансаб ваколатини суиистеъмол қилишда гумон қилиб қўлга олди.

Тергов маълумотларига кўра, гумонланувчи аввал Пастдарғом тумани прокуратурасида ишлаган вақтида воситачилар орқали 6,5 минг АҚШ доллари ва 35 миллион сўм миқдорида пора олган.

Ҳуқуқни муҳофаза қилувчи органлар талқинига кўра, ушбу маблағ маҳаллий корхоналардан бири томонидан табиий газдан ноқонуний фойдаланиш натижасида давлатга етказилган зарар миқдорини 2,9 миллиард сўмдан 805,9 миллион сўмгача камайтириш эвазига берилган.

Тергов, шунингдек, мазкур корхона мансабдор шахсларига нисбатан қўзғатилган жиноят ишини тергов қилиш доирасида гумонланувчи компания эгасидан яна 15 минг АҚШ доллари талаб қилганини таъкидламоқда.

Бунинг эвазига у зарар миқдорини 150–200 миллион сўмгача камайтиришга, шунингдек, суд органларидаги алоқалари орқали иш фигурантларига нисбатан енгилроқ жазо тайинланишига кўмаклашишни ваъда қилган.

Мазкур ҳолат юзасидан жиноят иши қўзғатилди.

Гумонланувчига нисбатан қамоққа олиш эҳтиёт чораси қўлланилди. Тергов ҳаракатлари давом этмоқда.