Ресторанлар экологик тарифларни қайта кўриб чиқишни сўрамоқда

Тошкент, Ўзбекистон (UzDaily.uz) — Ўзбекистонда умумий овқатланиш соҳаси тадбиркорлари билан ўтказилган очиқ мулоқот давомида кафе ва ресторанларга нисбатан қўлланилаётган экологик тўловларни ҳисоблаш масаласи кўтарилди.

Амалдаги меъёрларга кўра, чиқиндилар бўйича экологик нормативлардан ошганлик учун компенсация тўловлари оширувчи коэффициентлар асосида ҳисобланади ва бу коэффициент 20 бараваргача етиши мумкин. Ушбу амалиёт умумий овқатланиш корхоналарига ҳам татбиқ этилади, гарчи улар саноат ишлаб чиқаришига кирмаса ҳам.

Айрим ҳолларда бизнес учун қўшимча харажатлар 80–100 миллион сўмгача етиши қайд этилмоқда. Тадбиркорлар фикрича, бу ҳолат соҳада катта молиявий юклама яратади.

Тадбиркорлар кафе ва ресторанлар фаолияти саноат объектларидан кескин фарқ қилишини таъкидлаб, уларга нисбатан бир хил коэффициентларни қўллашни асоссиз деб ҳисоблашмоқда.

Шу муносабат билан умумий овқатланиш корхоналари учун амалдаги коэффициентларни қайта кўриб чиқиш таклифи муҳокама қилинмоқда. Жумладан, уларни камайтириш ёки кўп қаватли уйларнинг биринчи қаватида жойлашган, майдони 200 квадрат метргача бўлган кичик корхоналарга умуман татбиқ этмаслик таклиф этилмоқда.

Таъкидланишича, бундай объектлар фаолият бошлашдан олдин газ таъминоти, электр энергияси, ёнғин хавфсизлиги ва бошқа муҳандислик-техник талаблар бўйича ваколатли органлар билан мажбурий тарзда келишувдан ўтади ва шундан сўнг фаолият юритишга рухсат олади.